طالبانو د پاکستان مرستو ته اجازه نه ده ورکړې
۱۴۰۲ مهر ۲۱, جمعه
دغې باروي سرچینې دا په ډاګه نه کړه چې دې مرستو ته یې ولې اجازه نه ده ورکړې خو له دې وړاندې د ځینو رسنیو په حواله راغلي چې دا مرستې وروسته له هغه رد شوې چې د پاکستان لنډ مهالي لومړي وزیر انوار الحق کاکړ پر خپله ایکس یا ټویټر پاڼه یو جنجالي او متناقض پیغام خپور کړو.
په هرات ولایت کې له زلزلې وروسته، اسلام اباد سمدستي اعلان وکړ، چې د افغانستان هرات ولایت زلزله ځپلو سره به ۵۰۰۰ خیمې، ۱۵۰۰۰ کمپلې، خوراکي او طبي توکي او د ډاکټرانو یوه ډله په یوه ټرانسپورټي الوتکه کې افغانستان ته ولېږي.
خو د پاکستان حکومت د دغه محمولې له اماده کولو څو ساعته وروسته د پاکستان لنډ مهالي لومړي وزیر انوار الحق کاکړ پر خپله ایکس یا ټویټر پانه یو پیغام خپور کړو چې دا مرستې د طالبانو د حکومت په غوښتنه شوې، په داسې حال کې چې طالبانو په رسمي ډول له کوم بهرني هېواد څخه د مرستې غوښتنه نه ده کړې.
د انوار الحق کاکړ له دغه جنجالي پیغام خپرولو وروسته طالبانو د پاکستان دغه مرسته رد او بیرته پاکستان ته ستنې کړي دي.
بل لورته په پاکستان کې د پښتون ژغورنې غورځنګ مشر منظور پښتین تیره ورځ پر خپله فیسبوک پاڼه لیکلي چې په پاکستان کې د هرات زلزله ځپلو سره د مرستې په خاطر کړې خیمې ته یې پاکستان اجازه نه ده ورکړي.
خو پاکستان تر دې دمه په دې اړه کوم غبرګون ښودلی نه دی.