د اوکراین ولسمشر ته د امریکا له لوري د ایستلو وړاندیز شوی
۱۴۰۰ اسفند ۷, شنبه
رويټرز خبري آژانس د اوکراین له پلازمینې کیف څخه لیکي چې د شنبې په ورځ سهار وختي د دغه ښار په مرکز کې د ډزو غږونه اوریدل شوي او دغه راز په دغه ښار کې یوې پوځي اډې باندې هم برید شوی دی.
په عین حال کې رويټرز خبري آژانس بیا وايي چې د متحده ایالاتو حکومت د اوکراین ولسمشر، ولادیمیر زیلنسکي ته له کیف څخه د وښکلو وړانديز کړی دی خو دغه غوښتنه رد شوې ده.
زیلنسکي د امریکا د دغې غوښتنې په ځواب کې ويلي دي: «جګړه دلته ده، زه مهماتو ته اړتیا لرم نه سفر ته.» د امریکا د څارګرې ادارې یو چارواکی چې له دغو خبرو سره یې مستقیم تماس درلود، د زیلنسکي دریځ یې خوشبينانه توصیف کړی دی.
رپوټ زیاتوي، روسي ځواکونه د شنبې په ورځ وروسته له هغې کيف ښار ته ورنژدې شوي، چې د روسیې هوايي ځواکونو د اوکراین په مختلف سیمو کې پوځي مرکزونه په نخښه کړل.
رويټرز همدارنګه د روسيې د دوهمې ایلیوشین-۷۶ (Ilyushin Il-76) ډوله پوځي ترانسپورتي الوتکې له ويشتلو او نسکورولو څخه خبر ورکړی دی. د دوو امریکايي چارواکو له قوله ويل شوي چې دغه الوتکه د اوکراین بلا تسرکیفا ښار ته نژدې غورځول شوې ده. یاد ښار د کيف سويل ته په ۸۵ کيلومترۍ کې پروت دی. اوکرايني ځواکونو د جمعې په ورځ هم د روسيې یوه پوځي ترانسپورتي الوتکه چې پراشوټي ځواکونه يې لیږدول نسکوره کړې وه.
آ/م.ک.ص./ا.خ.ح.