رپوټ: د اوکراین په ختیځ کې یو المانی جنګیالی وژل شوی دی
۱۴۰۲ اسفند ۲۶, شنبه
د المان دولتي شبکې د جمعې پر ورځ (د ۲۰۲۴ د مارچ ۱۵نيټه) د »اوکراین له خاورې د دفاع نړیوالې لوا« په حواله خبر ورکړی، چې یو ۳۷ کلن المانی وګړی چې د اوکراین په ختیځ کې یې د الوتکو د پېژندنې یوې برخې سره کار کاوه، وژل شوی دی. پر دغې سړي د پنجشنبې پر ورځ برید شوی.
«د اوکراین له خاورې د دفاع نړیواله لوا» یو بهرنی داوطلبه نظامي واحد دی، چې د اوکراین د حکومت او د ولسمشر ویلادیمیر زیلنسکي په غوښتنه د روسیې د یرغل د مقابلې له پاره په ۲۰۲۲ کال کې جوړ شوی.
دغې المانۍ رسنۍ د «نړیوالې لوا» له قوله ولیکل:« کله چې موږ له خټو څخه د هغه په را ایستلو بریالي شو؛ مړ و. دا مبارز چې لومړی نوم یې سټیفن و، یو رښتینی اتل و.»
د المان د باندنیو چارو وزارت د جمعې پر ورځ ( د ۲۰۲۴ کال د مارچ په ۱۵ نېټه) وویل، چې » د یوه الماني وګړي په اړه له رپوټونو خبر دي، چې احتمالآ اوکراین کې د جګړهييزو عملیاتو پر مهال وژل شوی.« دغې وزارت ویلي، چې په کیف کې د المان سفارت هڅه کوي، دا موضوع روښانه کړي.
د المان «تحریریه شبکې» لیکلي، چې څه باندې یو کال مخکې یې له دغې الماني وګړي سره د اوکراین په ختیځ خارکیف کې خبرې کړې وې. سټیفن په دغې لیدنه کې ویلي وو، چې « پنځه کاله د المان د پوځ غړی و او افغانستان کې د الماني پوځ د حضور پر مهال درې ځل د دندې له پاره هغې هېواد ته تللی وم.»
وژل شوی کس سټیفن د المان په سویل کې د لېږد رالېږد یو شرکت لري او په ۲۰۲۲ کال کې اوکراین ته تللی و. له دې امله، چې روسیې د دغې سړي په اړه د معلوماتو تر لاسه کولو له پاره انعام ټاکلی و، نو هغه خپله نه غوښتل چې په رسنیو کې یې په اړه معلومات خپاره شي.
aj.rsh (AFP)