روسیه: د ګازو سلنډر په چاودنه کې ۹ کسان وژل شوي
۱۴۰۱ آبان ۲۸, شنبه
ځايي چارواکي وايي چې دغه چاودنه په یوه پنځه پوړيز ساختمان کې د ګازو د سلينډر د چاودنې له امله رامنځ ته شوې ده. دوی زیاتوي چې چاودنه د مسکو په وخت د سهار شاوخوا پنځه نېمې بجې په تيموفسکوئه ښارګوټې کې شوې چې په نتيجه کې ېې د پنځه پوړيز ساختمان یوه برخه راغورځېدلې ده.
د ساخالین والي، والري ليمارنکو پر ټيلګرام ليکلی چې د ژغورنې ډله تر ویجاړيو لاندې د نورو قربانیانو لټون کوي. د هغه په وینا د شاوخوا ۳۳ کسانو له ډلې چې فکر کېږي په دغه ساختمان کې اوسېدل، د ځينو برخليک ناڅرګند دی.
د والي په خبره په چاودنه کې اغیزمن شوو کسانو ته موقتي سرپناوې برابرې شوي او هغه کورنۍ چې کورونه ېې ویجاړ شوي ورته به پنځه لکه روبل (۸۲۱۷ ډالر) ورکړل شي. تمه ده چې په چاودنه کې د وژل شوو کسانو خپلوان به يو میلیون روبل (۱۶۴۳۴ ډالر) ترلاسه کړي.
د ساخالين ټاپو په آرام سمندر کې د جاپان په شمال کې پروت دی.