د یوې کښتۍ په ډوبیدو کې ۱۵ مهاجر وژل شوي
۱۳۹۴ آبان ۲۰, چهارشنبه
د مهاجرت په اړه لازیات معلوماتو دلته موندلې شئ
رويترز خبري آژانس د چهارشنبې په ورځ (د نومبر میاشتې۱۱) د ترکیې خبري آژانس«ډوگن» په حواله ویلي دي چې د یونان په لور روانه دغه کشتۍ همدا د ترکیې په سمندري ساحه کې ډوبه شوې ده.
د انقرې چارواکو د دغه خبر پخلی کړی دی او ویلي یې دي چې تر پیښې وروسته ساحلي ساتونکو د عاجلو عملیاتو په ترڅ کې ۲۷ انسانان ژغورلي دي.
په مړو کې ماشومان هم شامل دي. د «ډوگن» خبري آژانس په حواله له لرگیو څخه جوړه دغه کښتۍ د خپل سفر تر پیلولو سمدستي وروسته چپه شوې وه، چې له امله يې د کښتۍ ډیر سپاره په اوبو کې ډوب شوې ول.
د ترکیې ساحلي محافظینو په سمدستي توگه د دغه پيښې په اړه ډیر څه نه دي ویلي. په دې وروستیو میاشتو کې په سلگونو زره انسانانو د ترکیې له ساحلي سیمو څخه د کښتيو په وسیله د یونان لیسبوس ټاپو ته د رسیدو هڅه کړې.
د کښتۍ ډوبېدو په ډیرو پیښو کې بې شمیره انسانانو خپل ژوند له لاسه ورکړی دی. سربیره پر دې چې هوا سړه شوې ده، مهاجرینو د اروپا په لور خپل سفر جاري ساتلي دي.
د منځني ختیځ له جگړه ځپلو او یا په کورنۍ جگړه کې ښکیلو هیوادونو کډوال هڅه کوي چې د ترکیې له لاري اروپایې هیوادونو ته ځان ورسوي. د ملگرو ملتونو په حواله په دغو کسانو کې د شمالي افریقایې هیوادونو اوسیدونکي هم شامل دي. اروپایې اتحادیه په دې اند ده چې ترکیه د کډوالو کړکیچ د حل په برخه کې مهم رول لوبولی شي.
د اروپایې او افریقایې هیوادونو مشران نن (د نومبر میاشتې۱۱) په مالتا کې د یوه نړیوال کنفرانس په ترڅ کې سره ویني. دغه مشران به هڅه وکړي چې د مهاجرت کړکیچ له پاره یوه حل لاره پيدا کړي.
اروپایې اتحادیه هیله لري چې د نړۍ له بې وزله هیوادونو سره مالي مرستي کیدای شي تر ډیره بریده له دغو هیوادونو څخه د مهاجرت مخه ونیسي.