د ګوانتانامو یو بندي اوس دوکاندار دی
۱۳۹۷ مرداد ۲۵, پنجشنبه
احمد احجمام د یوروګوائې هیواد په پلازمېنه مونټي ویدی، کې د« احمد احجمام عرب ګیسترونومي» په نوم یو کوچنی کاروبار پیل کړی دی. احمد احجمام په خپل دوکان کې اکثره د خوړو خواږه شیان پلوري.
په ۲۰۱۴م کال کې د امریکا متحده ایالاتو او یوروګوائې د حکومتونو ترمنځ د تړون په اساس هغه له ګوانتانامو زندان څخه د سويلي امریکا دغه هیواد ته واستول شو.
احمد احجمام له هغو ۷۸۰ بندیانو څخه وو چې امریکا هغه په ۲۰۰۲م کال کې ګوانتانامو ته استولي ول. د څه مودې راهیسې امریکا د دغو بندیانو د انتقالولو په خاطر له یو شمیر هیوادونو سره خبرې اترې پیل کړي دي. ګوانتانامو بې له بندیانو سره د ناوړه چلند له کبله شخړیز زندان بلل کیږي.
احجمام په خپل دوکان کې د بغلاوې سربیره د یوروګوایي سیمه ایز خواږه یا میټایان هم پلوري. نوموړي د خپل دوکان د پرانیستې پر مهال له رسنیو سره په خبرو کې وویل: «دا زما له پاره د یو خوب د پوره کیدو په شان دی. زما په نوي ژوند کې دا یو مهم ګام دی. زه د یوروګوایې د خلکو منندویه یم. زه به ډیر زحمت وباسم».
د امریکا د دفاع وزارت چارواکي ادعا کوي چې احجمام د افغانستان په توره بوره کې د القاعده شبکې د مشر اسامه بن لادن په پلوي له امریکایې ځوکونو سره په جګړه کې برخه اخیستې ده. د دغې ادارې د معلوماتو له مخې د ۲۰۰۲م کال په جنورۍ کې افغانستان هغه امریکا ته سپارلی وو او د همدې کال په جون میاشت کې هغه د ګوانتانامو بې زندان ته واستول شو.
د احجمام ژوند یوه عجیبه کیسه لري. هغه د یوروګوائې هیواد له امریکا څخه د ترلاسه کونکو مرستو په بدل کې منلی دی. د احجمام تر څنګ شپږ نورو بندیانو ته چې له ګوانتانامو څخه استول شوي دي په یوروګوائې کې ادغامیدل او د کار پیدا کول ستونزمن تمامیږي.
د هغه دوکان د ښار د یوې خیریه ټولنې له خوا جوړ شوی دی. د همدې ټولنې یو کارکونکی وایې: «هغه په سوریې کې زرګر وو. اوس دا د هغه له پاره یو نوی بازار او نوی وخت دی». د هغه په خبره د احجمام د ټاټوبي دودیز خواړه د هغې له پاره د روزګار وسیله جوړیدلی شي.