د کرونا واکسین د تيست پر سر د افریقا او فرانسوي څیړونکو شخړه
۱۳۹۹ فروردین ۲۲, جمعه
د ناروغیو د کنټرول او وقایې مرکز د افریقا د برخي رئيس جان ان کینګسانګ ويلي دي چي دغه ډول راسیستي، د کرکي وړ او افریقایانو د کښته راوستلو ویناوي باید ټوله عاقل خلګ وغندي.
تردې لږ مخکي دوو فرانسوي ډاکټرانو او څیړونکو په یوه ټلویزوني مرکه کي وړانديز کړی وو، چي د کرونا ویروس ممکنه واکسین دي په افریقا کي ټِست سي، چیري چي په خبره یې »هیڅ ماسکونه، معالجه او د بیرته پر هوښ راتللو امکانات نه سته«.
اوس که څه هم هغوی بخښنه غوښتې ده، خو د راسیسټانو تور پرې لګول کیږي. د نړیوال روغتیايي سازمان رئیس، تیدروس ګیبریسوس بیا د یوه استعماري ذهنیت خبره کړې ده.
د افریقايي هیوادو صحي چارواکي له نړیوال روغتیايي سازمان سره د نژدې ګډ کار اعلان کړی دی، تر څو دا معلومه کړي چي ایا په افریقا کي د کرونا معالجه او د بدن د دفاعي سیسټم د تقویې کوښښونه له علمي او اخلاقي نظره اجرأ کیږي؟
د ګیبریسوس په خبره ځکه نو باید په افریقا کي هم د نوري نړۍ په ډول د کرونا ضد تدابیرو تګلاره عملي سي. دا چي افریقا د خپلو کارپوهانو له وجهي د خارج څخه د کومک غوښتنه نه ده کړې، دغه براعظم د ایبولا پر ضد د واکسین جوړولو پر وخت لا ثابته کړې ده.
زموږ له آرشیف څخه: