د ښځو نړېواله ورځ؛ یونیسف وايي د ښځو ختنه مخ په کمېدو ده
۱۴۰۲ اسفند ۱۸, جمعه
تازه
اسوشتید پریس په تازه رپوت کې وايي چې د فرانسې عدليې وزير، د جمعې په ورځ د ښځو د سقط جنین حق ضمانت د فرانسې په قانون کې ورزیات کړ. د ښځو په نړېواله ورځ د فرانسې دغه اقدام له ښځو څخه د ملاتړ په برخه کې یو ځواکمن پیغام بلل شوی دی.
د فرانسې عدلیې وزير، اریک دوپوند مورتي، په جوړ شوي ځانګړې محفل کې د ۱۹مې پېړۍ د چاپ يو ماشین څخه په استفاده دغه اصلاحیه د فرانسې په اساسي قانون کې مهر کړه چې ورسره په محفل کې چک چکو آوازونه پورته شول. د مکرون په دغه اقدام سره، فرانسه د نړۍ لومړنی هېواد وګرځېد چې د ښځو د سقط جنین حق ېې په خپل ملي منشور کې تضمین کړ.
د فرانسې ولسمشر امانويل ماکرون نن جمعه د مارچ اتمه په پاريس کې د ښځو د سقط جنین حق تر قانوني کيدو په یو لړ ځانګړو مراسمو کې ګډون وکړ. فرانسه په داسې حال کې دغه اقدام کوي چې نن په نړۍ کې د ښځو نړېواله ورځ لمانځل کيږي.
په فرانسه کې د ښځو د سقط جنین موضوع له ۱۹۷۵ راهیسې مجاز ده، خو ماکرون تېر کال ژمن شو چې له هغې به لا بهتره محافظت کوي. د فرانسې ولسشمر وروسته له هغې دغه ژمنه وکړه چې د امریکا متحده ایالاتو سترې محکمې په ۲۰۲۲م کال کې د دغه پروسيجر په لغوه کولو، ایالتونو ته اجازه ورکړه چې په انفرادي توګه پر دې بندیز او یا محدویت لګوي.
سقط جنین «تضمین شوې آزادي»
د دوشنبې په ورځ، د فرانسې پارلمان د دواړو مجلسونو یوې نادرې کنګرې په یوه تاريخي رای اچونه کې د حامله ګۍ ختمولو اصلي متن ته د یوې «تضمین شوې آزادي» په توګه شين څراغ ښکاره کړ. دغه اقدام په فمینستانو، چې د ښځو او نارینه و له پاره پر مساوی حقونه ټينګار کوي، د جشن لمانځل ایجاد کړ.
په دې ارتباط په پاریس کې ځانګړې مراسم د مارچ اتمه د ښځو نړېوالې ورځې سره په یو وخت کې جوړيږي. که څه هم ځينې محافظه کاران لا هم د دغه قانون په خلاف دي، خو د فرانسې اکثریت ولس د مکرون له دغه اقدامه ملاتړ کړی دی.
د فرانسې حکومت ویلي دي چې د دغه قانون د لا بهتره ډاډمنتیا له پاره به وروسته له دې د اروپايي اتحادیې په سطحه هڅې کوي. د حکومت ویاندې پریسا تیونوت د چهارشنبې په ورځ وويل: «فرانسه اوس باید د اروپايي اتحاديې په کچه مبارزه وکړي. ولسمشر مکرون په ۲۰۲۲م کال کې ويلي وو چې هغه غواړي د سقط جنین حق د اروپايي اتحاديې منشور په اساسي حقونو کې وراضافه کړي.»
«۳۵۰ ملیونه ښځې او نجونې ختنه شوي»
بل خوا د ښځو نړېوالې ورځې سره سم، یونيسف یا د ملتونو د ماشومانو وجهي صندوق، په نړۍ کې د ښځو د ختنې پر موضوع یو رپوټ خپور کړی دی. د فرانسې خبري آژانس د رپوټ پر اساس، یونسیف وايي چې په نړۍ کې له ۳۵۰ ملیونو څخه ډېرې ښځې د ختنې په موخه تر جراحۍ لاندې نيول شوي چې اکثریت ېې په افریقا کې ژوند کوي.
د يونيسف رپوټ وايي چې په تېرو اتو کلونو کې پر شاوخوا ۳۰ ملیونه کسانو دغه طریقه عملې شوې چې په هغې کې د تناسلي آلې باندنۍ برخه يا په قسمي او یا په بشپړه توګه پرې شوې ده.
«په نجونو او ښځو کې ختنه مخ په کمېدو ده»
د ملګرو ملتونو دغه اداره زیاتوي چې اوسمهال په نجونو او ښځو کې د ختنه کولو فیصدي مخ په کمېدو ده خو سره له دې هم خبرداری ورکوي چې مخ په ډېرېدونکو نفوس ته په کتو کې د دغې پدېدې د لمنځه وړولو له پاره هڅې سستې پر مخ ځي: «د ښځو ختنې د کمېدو په حال کې دي، خو په کافي اندازه چټکې نه.»
ناسم باورونه او جانبی عوارض
د ښځو ختنې په ارتباط داسې ناسم باور موجود دی دا چې دا د ښځو جنسي تمایلات کنټرولوي، په داسې حال کې چې برخلاف دغه عمل کېدای شي په ښځو کې د شدیدې خونريزۍ او حتی د مړېنې سبب واقع وګرځي. په نجونو کې ختنه، د ماشومتوب او د پيغلتوب د لومړیو وختونو ترمنځ په مختلفو عمرونو کې ترسره کيږي.
دغه عمل کولی شي په اوږدمهال کې د ښځو د ادراو په مجرا او مياشتني عادت پر وخت د عفونتونو د ایجاد سبب واقع شي. همدارنګه په ښځو کې د درد، جنسي اړیکې ته نه تمايل، د زيږون پر وخت ستونزو، ډېپريشن، د حقارت حس او د مابعد رواني اختلالاتو سره د مخ کېدو په څېر جانبي عوارض له ځانه سره ولري.
آژانسونه/م.ک.ص./ن.ز.
له آرشیف څخه: