د پاکستان پوځ: درې پاکستاني عسکر او یو وسلوال وژل شوي
۱۴۰۲ شهریور ۱۱, شنبه
د جمعې په ورځ ناوخته د پاکستان پوځ په یوه بیان کې ویلي چې د پاکستان امنیتي ځواکونو د شمالي وزیرستان په میرانشاه کې د وسله والو د موجودیت په هکله د استخباراتي راپورونو له ترلاسه کولو وروسته د دوی پر ضد عملیات پیل کړل. په خبرپاڼه کې ویل شوي، کله چې پوځیان سیمې ته ورسیدل، دوی د وسله والو یوه ډله ولیده چې بیا وروستو د دواړو لوریو ترمنځ سختې ډزې پیل شوې. پوځ په اعلامیه کې زیاته کړې چې د ډزو په نتیجه کې د عملیاتو مشر او یو بل سرتیری وژل شوي دي. خبرپاڼه زیاتوي چې په دې نښته کې یو وسلوال کس وژل شوی او يو بل ټپي شوی دی.
د پاکستان پوځ همدا راز زیاته کړې چې د جمعې په ورځ يې دافغانستان سره په پوله د خيبر ضلعې په تيره دره کې د تندلارو پر يوه پټنځاي عمليات کړي چې پکې يو پاکستانی عسکر او يو جنگيالي وژل شوي دي. په دې وروستیو ورځو کې د پاکستان په شمال لویدیځ کې پر امنیتي ځواکونو د وسله والو بریدونه زیات شوي دي.
د پنجشنبې په ورځ د پاکستان په شمال لویدیځ کې د امنیتي ځواکونو پر کاروان ځانمرگي برید وشو چې له امله یې نهه سرتیري ووژل او شل نور ټپیان شول. برید د خیبر پښتونخوا په بنو ولسوالۍ کې شوی وو. بنو د شمالي وزیرستان دروازه ده چې د لسیزو راهیسې د وسله والو لپاره د خوندي پټنځای په توګه کارول کیږي.
په ورته وخت کې پاکستاني طالبانو هم په پاکستان کې خپلو بریدونو ته شدت ورکړی دی. پاکستان بیا تور پورې کوي چې پاکستاني طالبان د افغانستان له خاورې بریدونه تنظیموي.