د پاکستان پولیسو په سلونو اعتراض کوونکې ښځې نيولي

پاکستاني چارواکي او فعالان وايي چې پاکستاني پولیسو همدارنګه پر اعتراض کونکو اوښکې بهوونکي ګاز وشيندل.

د اعتراض مشرې، ماهرنګ بلوچ، وويل چې په دغه اعتراض کې په بلوچستان ایالت کې د لادرکه شوو کسانو مېرمنو، خويند او لوڼو برخه اخیستې ده. هغې وويل په زرونو اعتراض کوونکي چې د پاکستان له مختلفو علاقو څخه دي پنجشنبه (د دسمبر ۲۰مه) وختي اسلام آباد ته ورسيدل.

د پاکستان د پولیسو ویاند، ضیا باجوه، په همدې ورځ وويل چې د پولیسو په شپني عملیات کې لږ تر لږه ۲۰۰ کسان نيول شوي دي. د پاکستان دننه او په نړيواله سطحه بشري سازمانونو چې په هغو کې د بشري حقونو د څار او د بخښنې نړېوال سازمان هم شامل دي، د سوله ایزو اعتراضونو پر وړاندې د پاکستاني چارواکو زورزیاتی غندلی دی.

فعال، پيردهان بلوچ، وويل چې د نوو اعتراضونو لړۍ د دسمبر مياشتې له شپږمې د بلوچستان ایالت په تربت ښار کې د تروریزم ضد پولیسو له خوا د یو ځوان تر وژنې څو اوونۍ وروسته پيل شوي دي.

د آلمان خبري آژانس ليکي چې دغه اعتراضونه له تربته چې له اسلام آباده لږ تر لږه ۲۰۰۰ کيلومتره فاصله لري، پیل شول او تر اسلام آباده د لارې په اوږدو کې پراته ټول ستر ښارونه ېې هم تر پوښښ لاندې نيولي دي.

بلوچستان ایالت له لسیزو راهيسې د بيلتون غوښتونکو جنګیاليو او نورو ناامنیو څخه کړيږي، په مختلفو برخو کې ېې په زرونو نارينه لادرکه شوي او یا ېې په داسې حالت کې جسدونه موندل شوي چې د بدن غړي ېې قطع شوي دي.

فعالان او د قربانيانو کورنۍ د دغو قتلونو او لادرکه کېدو پړه د پاکستان پر ځواکمنه جاسوسي اداره، آی اس آی، او د دغه هېواد پر پوځ وراچوي.

پیردهان بلوچ، وويل چې د ماهرنګ بلوچ پلار د طب ډاکټر وو او هغه مهال چې مېرمن بلوچ ماشومه وه، برمته شو چې بیا وروسته يې مثله شوی جسد په یو بل ښار کې پيدا شو. ماهرنګ بلوچ له هماغه وخت راهیسې په بلوجستان ایالت کې د نورو لادرکه او وژل شوو نارینه و له مېرمنو، خويند او لوڼو سره اعتراضونه کوي.

(dpa)mks/nz

له آرشیف څخه: