د ملگرو ملتونو استازي اسرائیل په نژادي تبعیض تورن کړی

فلسطیني اشغال شویو سیمو ته د ملگرو ملتونو ځانگړي استازي ریچرد فالک، په دغو سیمو کې پر اسرائیلي چلند سخته نیوکه کړې ده. فالک په ژینو کې خبریالانو ته وویل چې د اسرائیلو سیاست د «اپارتاید» یا نژادي تبعیض لاره تعقیبوي چې په عین وخت کې دا د قومي تصفيې په معنی ده.

فالک چې د حقوقي چارو یو امریکايې پروفیسور او د یهودي دین پیرو دی، وايي چې له ۱۹۹۶ کال را په دې خوا ۱۱۰۰۰ فلسطینیانو د اسرائیلو د پریکړي پر اساس په ختیځ بیت المقدس کې خپل د اقامت حق له لاسه ورکړی دی.

نوموړي «په ختیځ بیت المقدس کې د قومي ترکیب په هکله د یو قانونمند او دوامداره نظام د رامنځ ته کولو د هڅو» یادونه کړې ده. فالک ویلي دي چې د اسرائیلو له خوا د فلسطیني خاورې د دوامداره اشغال موضوع باید د هالند په هیواد کې د هاگ نړیواله محکمه وڅیړي.

د هغه په اند وروسته له څه دپاسه ۴۵ کلونو اشغال څخه د هاگ نړیواله محکمه باید د فلسطینیانو د یوه قانوني دولت او بشري حقونو د حفاظت او ساتنې په برخه کې اغیزمن گامونه پورته کړي.

اسرائیل په آگاهانه توگه له نړیوالو حقونو څخه سرغړونه کوي

فالک زیاته کړه چې په فلسطیني سیمو کې د یهودیانو له پاره په غیر قانوني توگه د ښارگوټو د جوړولو پروگرام ته پراختیا ورکول، د فلسطینیانو خپلواکي تر پوښتنې لاندی راولي. سربیره پر دې اسرائیل د غزی په تړاډه کې په ډله ېیز زور زیاتیو لاس پورې کوي، کورونه ورانوي او په پرله پسې توگه له حده زیات قدرت څخه استفاده کوي. یوازې د نړیوالو حقونو له پلوه نه، بلکې خپله د فلسطینیانو د موقعیت له امله هم وضعه لا پسې خرابیږي.

فالک چې ۸۳ کلن دی د اسرائیلو هغو تاسیساتو ته هم اشاره کوې چې پخوا تر دې په ۲۰۰۴ کال کې د نړیوالې محکمې له خوا غیر قانوني بلل شوې ول.

ویل کیږی چې د اسرائیلو له خوا په جوړ شوي حفاظتي دیوال کې ۸۵ سلنه فلسطیني ساحه نیول شوې ده. د دغه ۷۰۸ کیلو متري تاسیساتو ۶۰ سلنه ساختماني چاري بشپړي شوې دي او اوس يي هم کار روان دی چې دا د نړیوالو قوانیونو خلاف یو عمل دی.

فالک پر اسرائیلو د ډیر زیات انتقاد له امله شهرت لري. د ملگرو ملتونو د دغه استازي کاري دوره وروسته له شپږو کلونو څخه په همدې میاشت کې پای ته رسیږي. ریچرد فالک به د دوشنبې په ورځ خپل وروستی رپوټ د ملگرو ملتونو د بشري حقونو سازمان ته وړاندې کړي.