د روسیې پارلمان د اوکراين د څلورو سيمو الحاق تصويب کړ
۱۴۰۱ مهر ۱۱, دوشنبه
د روسیې د پارلمان په استازو مجلس يا «دوما» کې د دوشنبې په ورځ د رایې اچونې په ترڅ کې هیڅ کوم استازي د دې پريکړه ليکونو پر ضد رايه ونه کاروله چې له روسیې سره د اوکراين د خیرسون، لوهانسک، دونيڅک او زاپوريژيا سيمو غيررسمي الحاق تائيدوي.
د پارلمان وياند وياچسلاو وولودين د تليګرام له لارې د روسیې د هغه نقشې په نشرولو سره چې دا څلور سيمې او همدا راز د کريميا نيمه ټاپو سيمه هم پکې د روسیې برخه ښوول شوې، ويلي دي چې «پريکړه په يوه خوله ومنل شوه. اوس د روسیې په فدراسيون کې ۸۹ اداري ساحې شتون لري.» د کريميا نيمه ټاپو په ۲۰۱۴م کال کې د روسیې له خوا الحاق شوی وو چې نړيوالو دغه الحاق په رسميت نه دی پيژندلی.
امنیت شورأ: روسیې د الحاق مسوده ویټو کړه
په دوما کې تر رایې اچونې وروسته د روسیې د بهرنيو چارو وزير سرګې لاوروف په غير قانوني توګه د الحاق شويو څلورو سیمو استازو ته مبارکي ورکړه او ويې ويل چې دی ډاډی چې د سنا مجلس به هم دا اقدامات تصويب کړي.
داسې تمه نه کيدله چې دا پريکړه ليکونه به په استازو مجلس او يا د فدراسيون په شورا کې له کوم مخالفت سره مخ شي، ځکه دغه دواړه نهادونه د کريملن د تګلارۍ په توګه عمل کوي.
شتاینمایر: د روسېې د ټولپوښتنې نتايج نه منو
روسیې تېره اونۍ د اوکراين د څلورو سيمو د غير قانوني الحاق په موخه يوه رسمي پروسه پېل کړه خو له دغو سيمو څخه یې يوه هم په بشپړه توګه په کنترول کې نه ده او د اوکراين عسکر یې په جنوب او ختیځ کې د ځوابي عملياتو په ترڅ کې پرمختګونه کوي.
ب. ص/ ن. ز (Reuters)