طالبان: حتی یو بهرني عسکر ته هم د حضور اجازه نه ورکوو
۱۴۰۲ آبان ۲۹, دوشنبه
د امریکا متحده ايالاتو پخواني ولسشمر، دونالد ترمپ، چې د جمهوري غوښتونکو له لوري د امریکا د ۲۰۲۴م کال ولسمشريزو انتخاباتو ته د نوماند کېدو په هڅه کې دی، په یوه تازه وينا کې ويلي چې د ګټلو په صورت کې غواړي چې د افغانستان د بګرام هوايي اډې کنټرول بېرته په لاس راولي. هغه ويلي دي چې غواړي له دغه هوايي اډې د یوې ستراتيژيکي نقطې په توګه پر چين د نظارت کولو له پاره استفاده وکړي.
ترمپ په خپلو خبرو کې دجو بایدن ادارې د بګرام هوايي اډې د سپارلو پر تصمیم نيوکه وکړه او ادعا ېې وکړه چې دغه هوايي اډه چې د چين د اتومي توغنديو تولیدي تاسیساتو ته نژدې موقعیت لري، اوس چين تسخير کړې ده.
خو د طالبانو ویاند، ذبیح الله مجاهد، دويچه ویله ته په یو استولي غږيز پيغام کې ويلي دی: «موږ نه غواړو چې د افغانستان خاوره د هېوادونو ترمنځ د سیاسي لوبو ډګر وي. اجازه نه ورکوو چې حتی یو بهرنی عسکر هم په افغانستان کې حضور ولري.»