د ايران يوې محکمې د يوه افغان مهاجر د اعدام حکم صادر کړی

رویټرز خبري آژانس خبر ورکړی دی چې د ایران قضائیه قوې د سې ‌شنبې په ورځ اعلان وکړ چې هغه افغان کډوال ته یې د اعدام سزا اورولې ده چې پر درېو شیعه مذهبه مشرانو یې برید کړی و.

د ایران د سترې محکمې ویاند مسعود ستایش په یوې خبري ناستې کې چې له یوه دولتي ویب سایټ هم خپرېده وویل: «د انقلاب محکمې دا شخص په اعدام محکوم کړ او وکیل یې د تجددید نظر غوښتنه کړې ده. قضیه د هېواد عالي دیوان ته استول شوې ده.»

چارواکو ویلي دي چې، بریدګر ۲۱ کلن ازبک افغان دی. هغه تر برید وروسته د شیعه‌ګانو په تر ټولو لویې ټولېدنې کې چې په مشهد کې وه، ونیول شو.

په ایران کې د ۱۹۷۹م کال د اسلامي انقلاب وروسته د امنیتي تدابیرو سختولو او د مخالفو ډلو د ټکولو په لړ کې بریدونه او بمي چاودنې د لسګونو ایراني چارواکو او مذهبي مشرانو د وژلو سبب شوي.

له هغې نېټې وروسته دا په خپل ذات کې پر روحانیونو تر ټولو خونړی بريد ګڼل کېږي.

تېره اونۍ هم د ایران په اصفهان کې یو لوړپوړی محافظه کار روحاني مشر د جمعې له لمانځه وروسته د یوه کس له لوري په چاقو ټپي شوی و.

په مشهد کې پر درو ایراني روحانیونو د یوه افغان کډوال له برید وروسته په دغه هېواد کې له افغان کډوالو سره تاوتریخوالي زور واخست. د ایران د امنیتي ځواکونو او عامو خلکو له لوري د افغان کډوالو سره د زورزیاتي ګڼ شمېر رپوټونه خپاره شول، چې په نړیواله کچه یې غبرګونونه راوپارول.

په افغانستان کې هم د تشدد دغو پېښو غبرګونونه وپارول او د لاریونونو په ترڅ کې يې آن په کابل او هرات کې د ایران سیاسي استازولۍ هم تر بریدونو لاندې راغلې.

ځینو طالب چارواکو آن ایران ته خبرداری ورکړی و او د دغه هيواد سفیر یې احضار کړ؛ هاخوا ایران هم په تهران کې افغان سفیر احضار کړی و.

ایران هم تر اوسه په افغانستان کې د طالبانو حکومت په رسمیت نه دی پېژندلی.

په افغانستان کې د طالبانو د حکومت له پیل راهیسې ایران د تندرو افراطي ډلو پر نفوذ اندېښنه ښودلې او آن څو ځله د ایران او افغانستان پر پوله د طالبانو او ایراني ځواکونو تر منځ نښتې هم شوي دي.

ایران ویلي دي چې په افغانستان کې د طالبانو د حکومت له پیلېدو وروسته په زرونو افغانان ورکډوال شوي، چې په دې سره په ایران کې د افغان کډوالو شمېر له پنځو میلیونو اوښتی دی.