د ايران ولسمشر: «موږ له امريکا احترام غواړو»
۱۳۹۸ خرداد ۱۲, یکشنبه
روحاني د ايران د حکومت په رسمي صفحه کې دغه څرګندونې کړې دي. د هغه په خبره «موږ تر اوسه ښودلې ده چې هيڅ زورواکي ځواک ته نه تسليميږو.» د هغه په خبره بايد دواړه لوري «له احترام او د نړيوالو حقوقو په چوکاټ کې» سره ګډې ناستې ولري. د واشنګټن او تهران تر منځ ترينګلتيا په دې وروستيو کې ډېره زياته شوې وه. له ايران او ايران پلوو مليشو څخه متوجه ګواښ ته په اشارې سره واشنګټن د می مياشتې له پيل راهيسې د خليج په سیمه کې خپل حضور زيات کړی دی. د متحده آيالاتو ولسمشر دونالد ترمپ غواړي چې د «حد اکثر فشار» ستراتيژۍ د لارې ايران د خپل اتومي پروګرام او سيمه يز سياست په سر خبرو اترو ته مجبور کړي.
جاپان غواړي چې منځګړتوب وکړي
د همدې دليل له مخې د جاپان صدراعظم شينزو ابې د يوې رسنۍ د خبر په اساس د روانې مياشتې په نيمايي کې ايران ته يو سفر پلان کړی دی. د «ماينچي شيمبون» په نوم ورځپاڼې د يکشنبې په ورځ خبر ورکړی چې ابې د جون له ۱۲مې تر ۱۴مې پورې ايران ته ځي او غواړي چې له ولسمشر روحاني او د ايران له روحاني مشر ایت الله علي خامنه يي سره په ليدنو کې د دواړو هېوادونو تر منځ منځګړتوب وکړي. د اوونۍ په پيل کې اترمپ د جاپان په پلازمېنه توکيو کې له ابې سره د خبرو په موخه ليدلي ول.
AFP/NS/AWA