طالبان د بامیانو بند امیر ملي پارک ته د ښځو تګ منع کوي
۱۴۰۲ شهریور ۵, یکشنبه
د طالبانو د امر باالمعروف او نهی عن المنکر وزیر مرستیال خالد حنفي دغه څرګندونې په بامیان ولایت کې د یوې غونډې په ترڅ کې کړي دي. حنفي ویلي چې بند امیر پارک ته د ښځو پر تګ بنديز به تر هغه وخته پورې نافذ وي تر څو چې په دې اړه نوي مقررات نه وي رامنځ ته شوي.
نوموړي مرستيال وزير د دې ولایت پر امنيتي مسوولينو او د دغه ولايت پر اوسېدونکو غږ وکړ چې پارک ته د ښځو د ممانعت په پلي کولو کې دې همکاري وکړي. د حنفي په وينا، د دغه ولايت اوسېدونکو د تیرو دوو کلونو په ترڅ کې د یاد وزارت له لوري لارښوونې نه دي عملي کړي.
بل لوري ته د طالبانو یوه سیمه ایز چارواکي رسنیو ته ویلي چې یوازې هغه میرمنې چې "اسلامي حجاب" نه مراعت کوي پارک ته یې د تګ مخه نیسي.
د ۲۰۲۱م کال په اګست کې هغه مهال چې طالبان بیا ځلې واک ته ورسیدل، هغوی د نجونو د تعلیم او تربیې د مخنیوي سربیره په عامه ژوند کې پر ښځو باندې په تدریجي ډول محدودیتونه وضع کړي دي. تېر کال د طالبانو چارواکو د هېواد په ټولو تفریحي پارکونو کې د ښځو پر تګ بندیز وضع کړی وو.
بند امیر په ۲۰۰۹ کال کې د افغانستان لومړنی ملي پارک اعلان شو. د مرکزي افغانستان په غرنیو دښتو کې د بند امیر د ملي پارک په زړه پورې نیلي جهيلونه هر کال د نړیوالو سیلانیانو په ګډون په زرګونو کورني سیلانیان هم جذبوي.