بلوچستان: د وسلوالو په حمله کې څلور پاکستاني ځواکونه وژل شوي
۱۴۰۲ تیر ۱۱, یکشنبه
د بلوچستان ایالت د لومړي وزیر یو ویاند، بابر یوسفزي په یوه اعلاميه کې ويلي دي چې «تروریستانو په ږوب کې د تلاشۍ پر یوه پوسته د یو لاسي بم بريد کړی چې پکې څلور امنيتي ځواکونه وژل شوي دي.»
د ځايي پولیسو يو افسر، اختر شاه، د آلمان خبري آژانس ته وویل چې دغه حمله تر نيمې شپې وروسته شوې او دا چې تر شا ېې د چا لاس دی لا تر اوسه روښانه نه ده.
په رپوټ کې زیاته شوې چې کومې ډلې هم تر اوسه د دغې حملې مسئوليت په غاړه نه دی اخیستی.
ورته نور ولولئ: د پاکستان پوځ د شپږو وسلوالو د وژلو ادعا کړې
دغه حمله داسې وخت شوې چې تر دې یوه ورځ مخکې ناپېژاندو بریدګرو د بلوچیستان ایالت په مرکز کويټې ښار کې د پولیسو یو مرکز ته يو لاسي بم وغورځاوه چې په نتيجه کې ېې یو پولیس ټپي شو.
بلوچستان د پاکستان تر ټولو ستر ایالت دی چې له ایران، افغانستان او پاکستان سره ګډې پولې لري. دغه نا آرامه ایالت په پراخه کچه د اسلامپاله جنګياليو، فرقه يي ډلو او ملتپاله بېلتون غوښتونکو له خوا د ترسره شوو خونړیو بريدونه شاهد پاته شوی دی.
(dpa)mks/mns