ايټاليا د وچيدو په درشل کې ده؟

په ایټالیا کې د ګارډا جهيل ته، تلونکي کولی شي حتی د سان بیاګیو کوچني ټاپو ته د کوچني لارې په اوږدو کې تګ راتګ وکړي، دا ځکه چې د جهيل د اوبو کچه دومره ټيټه ده چې اوس حتی د شګو ډنډونه هم جوړېږي. د ژمي وروسته له ډیرې واورې یا باران پرته ، د ايټاليا په شمال کې د کرنې، څښاک او بریښنا له پاره د اوبو پایلې خطرناکې دي.

دا تفریحي کښتۍ له تیر دوبي راهیسې د گاردا جهيل په وچه څنډه کې پرتې دي. اوس د ژغورنې تدابیر نیول کیږي.

د پو سیند د اوبو کچه لاهم د ۲۰۲۲م کال له دوبې راهیسې نه ده ښه شوې. دا د کال په دې وخت کې د نورمال په پرتله شاوخوا ۶۰سلنه لږې اوبه دي. حتی د سیند په بستر کې د واورې دا نرۍ پرده نه شي کولی بدلون پکي راولي. نو راتلونکی دوبی به احتمالا د تیر کال په پرتله ناوړه وي، کله چې د ایټالیا ډېري سیمې باید اضطراري حالت اعلان کړي.

د وچکالۍ اغیزې د وینس اوبو بډایه کانالونو کې هم احساس کیدای شي. لوی ښار معمولا د کال په دې وخت کې د سیلابونو سره مخ کیږي.

په پو سیمه کې د اوبو د ټیټې کچې له امله، د سمندر اوبه تر ځمکې لاندې اوبو ته ننوځي او د ځمکې لاندې اوبه مالګيني کوي، چې د کرهڼیزو ځمکو خړوبول ناشوني کوي. د ۲۰۲۲ م کال په دوبي کې، د ایټالیا حکومت، وچکالۍ ځپلو سیمو سره د مرستې له پاره ۳۶،۵ ميلیونه یورو ورکړي. هغه به احتمالا سږکال ورته وسیلو ته لاره اواره کړي.