انځورونه: «اوږدې غاړې» درلودونکې نجونې سيلانيانو ته سترګې په لاره دي

د کايان کلی د «اوږدو غاړو» درلودونکو نجونو په درلودولو شهرت لري. دغه کلی چې د تايلنډ چیانګ مای ښار په ګاوڼد کې پروت دی، هر کال د سيلانیانو د هجوم شاهد وي، خو اوس د کرونا له وجې دغه خالي ښکاري.

۳۲ کلنه مو آي د کایان کلي اوسيدونکي ده. دا په خټه هم کايان ده. د دغه کلي نجونۍ له پنځه کلنۍ څخه د غاړې حلقې اغوستل پيلوي چې د وخت په تیریدو سره يې د حلقو شمیر ورزياتوي. هر څومره چې غاړه اوږده وي د لا ډير ښایست په معنی دی.

د کلي په ورودي دروازه کې د ټکټونو غرفې چې په سيلانيانو ټکټونه خرڅوي هم خالي دي. خو د کرونا وبا څخه مخکې به دلته ډير سيلانيان راتلل چې اکثره يې چينایان ول.

د کايان کلي د اوسيدونکو عواید چې تر ډيره د سیاحت پر صنعت متکي دي، اوس عوايد نه لري. له همدې امله دوی په ډيره بې صبرۍ د سيلانیانو بیرته ورتلو ته په انتظار کې دي. په خپله تايلنډي سيلانیان، د بهرنيو سيلانیانو په اندازه د کايان کلي او د هغو د اوږدو غاړو درلودونکو نجونو له لیدو سره علاقه نه لري.

مو آي، له بانس څخه جوړې د خپلې جونګړې مخې ته اور بل کړی، څو خپلې کورنۍ ته خواړه تيار کړي. دوي ډير ابتدايي خواړه پخوي چې تر ډيره وريجې او کيله په کې ګډوي. د دغه کلي اوسیدونکي حاضر وخت په کافي اندازه پیسې نه لري چې نور خوراکي مواد پرې راونیسي.

مو آي، دوه ماشومان لري چې د یوه عمر شپږ او د بل دوه کاله دی. هغه د خپلو ماشومانو د راتلونکې له پاره ډيره انديښمنه ده. د هغې خاوند کروندګر دی. په حاضر وخت کې دوی يوازې له همدې لارې خپله نفقه پيدا کوي، خو دغه کار هم اوس کله کله پیدا کيږي.

مو آي او د کلي نورې ښځې د کلي په ورودي دروازه کې يې له يوې مرستندویه موسسې څخه د خوراکي موادو مرستې ترلاسه کوي. هغه وايي چې د کرونا څخه مخکې به يې د ورځ څه باندې ۶۰۰ بات (د۲۰ ډالرو معادل) ګټل خو اوس يې عاید صفر دی.

د کايان اکثره اوسیدونکي د میانمار دي. اوس چې د دوی کارونه د کرونا له امله په ټپه دريدلي، بيرته میانمار ته ستانه شوي دي. له يوې ستنې شوې کورنۍ د ماشومانو د لوبو یو خرسک پاتې دی.

که څه هم اوس کایان ته سيلانيان نه ځي، خو مو آي لا هم دغه شيان چې سيلانيان يې د سوغات په توګه اخلي، دلته په ترتيب ږدي تر څو ښايي يو مشتري راشي له دې څيزونو واخلي. کرونا په تايلنډ کې د هغو کسانو ژوند ډير سخت کړی چې عايد يې د توريزم له صنعت سره تړاو لري.