ارګ: لس زره جنګیالي له پاکستانه افغانستان ته داخل شوي
۱۴۰۰ مرداد ۵, سهشنبه
د افغانستان ولسمشرۍ ماڼۍ یا ارګ د سه شنبې په ورځ (۲۰۲۱م کال د جولای ۲۷مه) د استخباراتي معلوماتو پر اساس خبر ورکړ چې لس زره جنګیالي له پاکستان څخه افغانستان ته راوښتي دي. د ولسمشرۍ ماڼۍ د ویاند مرستیال، محمد امیري وايي چې ۱۵ زره نور جنګیالی هم تشويق شوي دي چې د جګړې له پاره افغانستان ته داخل شي.
امیري ټيڼګار کوي چې دا ښيي چې د طالب جنګياليو روزنه، تمويل، درملنه او تبلیغات په پاکستان کې د يوې سیستماتيکي دستګاه له لوري تر سره کيږي. پاکستان او طالبانو تر اوسه پورې په دې اړه غبرګون نه دی ښکاره کړی.
د افغانستان دفاع وزارت هم تر دې وړاندې په افغانستان کې د لسونو پاکستاني جنګياليو د وژلو خبر ورکړی وو. د دغه وزارت ویاند، فواد امان پر خپلې فیسبوک پاڼې لیکلي چې د ۳۹ تنو پاکستاني جنګياليو جسدونه چې افغان ځواکونو سره په جګړه کې وژل شوي وو، د سره صلیب له طریقه پاکستان ته انتقال شوي دي.
د افغانستان حکومتي خبري آژانس، باختر تازه يو رپوټ خپور کړی چې د کپټان جاوید په نوم د پاکستان د پوځ یو برحاله افسر چې په لوګر، پکتیا او پکتیکا ولایتونو کې يې د طالبانو رهبري کوله، د ملي امنیت ادارې د ځانګړي عملیات په نتيجه کې وژل شوی دی. پاکستاني چارواکو په دې اړه څه نه دي ویلي.
دا په داسې حال کې ده چې د افغانستان او پاکستان تر منځ په وروستیو کې لفظي شخړو زور اخیستی دی. افغان حکومت د پاکستان پوځيان او استخباراتي ادارې د طالبانو په ملاتړ او ځای ورکولو تورنوي، خو پاکستاني چارواکي بیا دغه ادعاوې ردوي.