آلمان د کرونا له يوې سختې څپې سره لاس او ګريوان دی

د بن ښار په يوه هديره کې يو سړی د خپلې ښځې پر مړينه وير کوي. هغه په آلمان کې د کرونا د تر ۱۰۰ زرو ډېرو قربانيانو څخه يوه وه چې د نورو ناروغيو د درلودو ترڅنګ یې په کرونا د اخته کيدو له کبله ژوند له لاسه ورکړ. په دې وروستيو کې يو ځل بيا په ښکاره ډول د کرونا له کبله د مړينې پېښې ډېرې شوي دي.

پر يوه تابوت د خښولو د يوه خدماتي شرکت د کارکوونکي له پاره د خبرداري په توګه «کرونا» ليکل شوې ده. په دې وورستيو کې هم په کرونا زياتره هغه زاړه کسان مړه شوي دي چې د کرونا واکسين یې نه وو لګولی. خو ډېر واکسين شوي کسان هم په دې وروستيو کې په کرونا اخته کيږي.

برلين ته څېرمه د زړو کسانو د يوه استوګنځي د يوه اوسيدونکي د کرونا ټیست ترسره کیږي. په دې تېرو څو ورځو کې د زړو کسانو په استوګنځايونو کې د کرونا ډېرې پېښې رامنځته شوې او يو شمير زاړه کسان يې له امله مړه شول. له دې کبله د روغتيا څانګې د کارکوونکو له پاره د واکسين پر مکلفيت بحثونه روان دي. په ايټاليا، فرانسه او يونان کې دا مکلفيت شته، په اتريش کې به هم ژر عملي شي.

په ښوونځيو او وړکتونو کې په منظم ډول د کرونا تيستونه ترسره کيږي. سره له دې د پنځو او څوارلسو کلونو ترمنځ عمر لرونکو ماشومانو کې د کرونا کچه د لويانو په پرتله درې چنده لوړه ده. له همدې کبله ډېري ميندې او پلرونه د ماشومانو له پاره د کرونا واکسين جواز ته سترګې په لار دي. د روانې اوونۍ په پای کې به د اروپايي ټولنې اړونده اداره په دې تړاو پريکړه وکړي.

که څه هم چې تر اوسه په آلمان کې په روغتونو کې د بستري کسانو شمير د تېرکال د همدې مودې په پرتله ټيټ دی خو د روغتونونو عملې د خطر زنګ غږولی دی. په زاکسن ایالت کې يو شمير روغتونونه د دې ستونزمنې پريکړې کولو ته مجبور دي چې کوم مريض لومړی تداوي کړي.

په ريلونو او بسونو کې اوس د درې - جي مقررات عملي کيږي. دا په دې معنا ده چې په عامه ترانسپورت کې يوازې هغه کسان سفر کولی شي چې واکسين شوي وي، له کرونا رغيدلي وي او يا د کرونا منفي ټيست له ځانه سره ولري. د پزې او خولې د ماسک کارول هم جبري دی او د نه کارولو په صورت کې تر ۱۵۰ يورو نغدي جريمه هم ټاکل شوې ده.

څوک یې چې کولی شي بايد له کوره کار وکړي. د کوره د کار مکلفيت همدا د جون مياشت په پای کې له منځه وړل شوی وو خو اوس بيرته بايد عملي شي. د کرونا مخ پر زياتيدونکي شمير ته په کتو سره بايد تماس کم کړای شي.

د آلمان په يو شمير ښارونو او سيمو کې دمګړۍ د کرسمس بازارونه چې په آلمان کې ډېر محبوبيت لري، پرانيستل شوي دي. په ځیني نورو سيمو کې بيا د کرونا د لوړ شمير له کبله دغو بازارونو ته اجازه نه ده ورکړل شوې. په يو شمير سيمو کې بيا د ځينو لارښوونو په مراعت کولو سره سړی له دې بازارونو خوند اخيستلی شي.

دا چې په آلمان کې د کرونا واکسين د لګولو کچه ډېره لوړه نه ده نو حکومت هڅه کوي د نويو پروګرامونو سره دغه کچه لوړه کړي. د کرونا واکسين د دريم دوز لګولو په برخه کې هم بايد پرمختګ وشي څو د آلمان د راتلونکي صدراعظم اولاف شولڅ په خبره ولس د ژمي له پاره چمتو کړل شي.

د کرونا لوړ شمير او تر شپږو میاشتو تېريدو وروسته د کرونا واکسين په برخه کې ناکافي پرمختګ ته په کتو سره قيودات اړين بريښي. په هغه صورت کې يو شی ګټه کولی شي او هغه په منظم ډول د کرونا ټيست کول دي. دمګړۍ په ټول آلمان کې دغه ټيسټونه په وړيا توګه ترسره کيږي.