بايدن غواړي چې د ګوانتانامو زندان وتړي
۱۳۹۹ بهمن ۲۵, شنبه
د سپينۍ ماڼۍ يوې وياندې د جمعې په ورځ په يوه خبري غونډه کې د دغه زندان تړلو ته په اشارې سره وويل چې «دا هرومرو زموږ هدف او زموږ غوښتنه ده.» د هغې په خبره د امنيت شورا يې اوس دغه موضوع څېړي.
پخواني ولسمشر بارک اوباما په خپل انتخاباتي کمپاين کې لا د ګوانتانامو د تړلو ژمنه کړې وه خو له کانګرس سره هيڅ وخت هم يوې موافقې ته ونه رسید. د هغه ځای ناستي دونالد ترمپ په خپلو ټاکنيزو منډو ترړو کې ټينګار کړی و چې دغه زندان به پرانيستی وي څو «په بدماشانو» يې ډک کړي.
د ګوانتانامو زندان د ۲۰۰۱ کال د يولسم سپتمبر تر بريدونو او د متحده آيالاتو په مشرۍ د افغانستان له جګړې سره سم د پخواني امريکايي ولسمشر جورج بوش په وخت فعال کړل شوی و. لومړني بنديان پکې د ۲۰۰۲ کال په جنورۍ کې ځای پر ځای شول چې هغه وخت په قفسونو کې تر شنه آسمان لاندې ساتل کېدل. وروسته بيا د ټينګ امنيت بېلابېل زندانونه په کې جوړ شول.
د اوږدو کلونو په ترڅ کې په ګوانتانامو کې تقريباْ ۷۸۰ تنه بنديان ول. د بوش او د هغه د ځای ناستي اوباما پر وخت هم په سلګونو بنديان له ګوانتانامو څخه خوشي شوي ول. اوسمهال په کې تقريباْ ۴۰ تنه بنديان دي چې د ۲۰۰۸ کال راهيسې کوم نوی څوک په کې بندي شوی نه دی.
زموږ له آرشیف څخه: