يونيسف په کابل کې د اوبو له بحران څخه خبرداری ورکوي
۱۴۰۳ آبان ۹, چهارشنبه
د ملګرو ملتونو د ماشومانو د مرستې ادارې يونيسف په کابل ښار کې د اوبو د کمښت ستونزې په اړه خبرداری ورکړی دی. دغه ادارې د ټولنیزو رسنيو د ايکس [پخواني تويتر] له لارې ويلي دي چې که چټګ ګامونه پورته نه شي نو د کابو پنځو ميليونو وګړو دا ښار به تر ۲۰۳۰م کاله پورې د اوبو له شديد بحران سره مخامخ شي.
يونيسف په يوه اعلاميه کې زياته کړې ده چې په چټکۍ سره د ښاري استوګنې ډېرېدو او اقليم د بدلون اغیزې د دې باعث شوي چې په کابل کې تر ځمکې لاندې د اوبو کچه د پام وړ ټيټه شي.
د يونيسف د افغانستان استازي تاج الدين اويواله، اغیزمنو سیمو ته تر سفر وروسته وویل: «دا يو بشري بحران دی چې په چټکه توګه مرستې ته اړتيا لري.»
کارپوهانو وړاندیز کړی دی چې کابل ته د اوبو رسولو په موخه د پنجشير سيند د اوبو کارول به د دې بحران يو بالقوه حل وي.
خو په دغه هېواد کې د اقليم بدلون د پايلو اغیزمنتوب، اقتصادي بې ثباتي او د څو لسیزو کړکېچ پايلې د دې ډول پروژو عملي کولو په لار کې د پام وړ ننګونې دي.
د ملګرو ملتونو په حواله د افغانستان د نفوس کابو ۸۰ سلنه یې پاکو اوبو ته په کافي اندازه لاس رسی نه لري.
افغانستان د نړۍ له هغو هېوادونو څخه يو دی چې د اقليمي بحرانونو څخه ډېر اغیزمن دي. دا په داسې حال کې ده چې دغه هېواد په نړيواله کچه کابو هیڅ مضر ګازونه نه افرازوي.
د څو لسیزو جګړو او بحران وروسته دغه هېواد د اقليم د بدلون اغیزو ته د ځواب ويلو له پاره په کافي اندازه چمتووالی نه لري.
ب. ص/ ن. ز (dpa)