د روسي تیلو د قیمتونو له پاره د حد ټاکلو هدف څه دی؟
۱۴۰۱ آذر ۱۲, شنبه
د امریکایي چارواکو په حواله د میاشتو میاشتو راهیسې تر روانو بحثونو وروسته، بالاخره د دسمبر په دویمه نیټه لویدیځ متحد هیوادونو د روسي تیلو له پاره د قیمتونو د اعظمي حد پر ټاکلو موافقه وکړه.
د ټاکل شوي قیمت په اساس د روسیې د اومه تیلو د صادراتو له پاره به اوس له ۶۰ ډالره في بیلر زیاتې پیسې نه ورکول کیږي.
دا پریکړه به د روانې دسمبر میاشتې له ۵ نیټې څخه عملي کیږي او له دې سره امکان لري چې د روسیې په عایداتو کې د پام وړ کمښت راشي. له دې پریکړې سره به له یوې خوا د اوکراین د جګړې روان ساتلو له پاره د مسکو مالي امکانات اغیزمن شي او له بلې خوا به لږ عاید لرونکي اروپایي هیوادونه تر یوې اندازې د راحت ساه واخلي.
تر ټولو دمخه اروپايي اتحادیي له دې سره موافقه وکړه او لږ وروسته، د جي ۷ هیوادونو لکه متحده ایالاتو، کاناډا، جرمني، جاپان، بریتانیا، فرانسې، ایټالیا او آسترالیا هم هغه تصویب کړ.
روسیه: که د تیلو پر صادراتو مو بندیز ولګول شي، د ګازو عرضه هم بندوو
پولنډ د ډیرو ورځو راهیسې له ۶۰ ډالرو څخه هم پر کم قیمت ټینګار درلود. خو بالاخره اروپایي اتحادیي ورته قناعت ورکړ او تر دې وروسته اروپايي بلاک پر دې تړون خپل د نظر یووالی اعلان کړ.
د تړون په هکله غبرګون
تر پریکړې سمدستي وروسته د استونیا لومړي وزیر کاجاکالز په خپل تویتر ولیکل: «د روسيې له انرژۍ څخه ترلاسه کیدونکي عاید کمزوری کول، د روسیې د جنګي ماشین د درولو مترادف دی.»
د امریکا د خزانې وزیر جینټ ایلن وايي چې له دې تړون سره که له یوې خوا پوتین ته «په اوکراین کې د غیر قانوني جګړې له پاره د عاید عمده سرچینې د محدودولو په هدف کې بریالیتوب ترلاسه کیږي، له بلې خوا دا د نړیوالې انرژۍ تامین ته د ثبات وربخښلو په برخه کې هم مرسته کوي.»
نوموړي وویل: «د نن ورځې اعلان زمونږ د متحدینو د میاشتو میاشتو کوښښونو د پای ټکی دی او دې پایلې ته د رسیدو په برخه کې چې زمونږ متحدینو کوم زحمتونه ایستلي دي، زه یي ستاینه کوم.»
اروپايي اتحادیي، جي ۷ او آسترالیا په یوې ګډې اعلامیې کې ویلي دي چې د تیل د قیمتونو له پاره د اعظمي حد ټاکلو پریکړه د دې له پاره شوې ده چې د اوکراین پر وړاندې یرغلیزه جګړه کې د روسیې د ناوړې استفادې مخه ونیول شي.
د روسیې پر اومه تیلو بندیز
اروپايي اتحادیي، جي ۷ هیوادونو او آسترالیا د دسمبر له پنځمې نیټې څخه د روسیې پر خام یا اومه تیلو دغه بندیز عملي کولو پریکړه کړې ده.
آلمانی سياستوال د اوکراين جګړې وروسته بېرته روسي ګاز واردول غواړي
د پولنډ په وینا پر اوکراین د روسیې د برید په ځواب کې تر اوسه پورې دا تر ټولو مهم بندیز دی. د دغه هیواد په حواله: «اروپايي اتحادیه د بندیزونو په داسې یوې بستې کار کوي، چې د روسیې له پاره به لا زیات تکلیف ورکوونکې او په لوړه بیه تمامه شي.»
د کله راهیسې نه چې په اوکراین کې جګړه پیل شوې ده، له هغه وخت راهیسې د لویدیځو هیوادونو اصلي هدف دا دی چې د انرژۍ له درکه د روسیې عایداتي سرچینې محدودې کړای شي.
آژانسونه: ش.ن/ ن.ص