آکسفام: کرونا ټولنیزه نابرابری زیاتوي
۱۳۹۹ بهمن ۶, دوشنبه
دغه نړيوال سازمان په برلين کې د دوشنبې په ورځ (۲۰۲۱ م کال د جنورۍ ۲۵ مه نيټه) په برلين کې وړاندې کړل شوي رپوټ کې ويلي چې په داسې حال کې چې د نړۍ زر تنه شتمن کسان کولې شی د کرونا بحران له کبله ورته پيښ شوي زيانونه په نهو میاشتو کي بیا ورغوي، خو بې وزله او فقير کسان له دغه زيانونو څخه د وتلو له پاره د لسو کلونو څخه زياتې مودې ته اړتيا لري.
آکسفام د دغه څيړنې له پاره چې د «نابرابرۍ ويروس« تر سرليک لاندې خپره شوې، له ۷۹ هيوادونو څخه د ۲۹۵ اقتصادې کارپوهانو او غوره څيړونکو څخه د نابرابرۍ موضوع په هکله پوښتنې کړي. له دوې څخه ۸۷ سلنه پوښتل شويو کسانو ويلې، چې د کرونا بحران له کبله يې په هېواد کې د ډيرې نابرابرۍ د رامنځته کيدو او يا کم تر کمه د دې د ډيريدلو انتظار کيږې. نړیوال بانک برسیره پردې وړاندوينه کوي، چې په ۲۰۳۰ م کال به په نړۍ کې ډير خلک د کرونا له پيل څخه مخکې وخت په پرتله په فقر او بیوزلۍ کې ژوند وکړي.
اړونده موضوع: آلمان: د کرونا کړکیچ د کوچنیانو بې وزلي زیاته کړې
له همدې کبله پراختيايي سازمانونو د مالیاتو سیاست په برخه کې د لنډې مودې بدلون غوښتنه کړې ده، تر څو شرکتونه وکولې شي په مناسب ډول د عامه مالياتو تامين په برخه کې ګډون ولرې. په آکسفام کي له آلمان څخه د «ټولنيز عدالت» د ټيم رئیس توبیاس هاوشيلډ ټينګار کړې دی: «په اوس وخت کي ستر او ډير شتمن شرکتونه د دغه بحران د منځه وړلو له پاره باید خپله عادلانه ونډه ادا کړي.»هغه زياته کړه:« موږ باید په ټولنه کي د نابرابریو په هکله وپوهيږو او خپل شرايط د یووالي او چاپيریال ساتنی په روحيه برابر کړو.»
د مرستې رسولو سازمان آکسفام په نړۍ کې د بیوزلۍ او لوږې د منځه وړلو له پاره فعالعيت کوي، چې د نړۍ له ۹۰ څخه زياتو هیوادونو کې له اتلس څخه ډير سازمانونه ورسره فعالعیت کوي او شا او خوا درې زره همکار بنسټونه لري.
زموږ له آرشيف څخه: