د نوبل د طب جایزه د هيپاتايت سي پيژندونکو ته ورکول کيږی
۱۳۹۹ مهر ۱۴, دوشنبه
د ستاکهولم د کاروليسنکا انستيويت د دوشنبې په ورځ اعلان وکړ چې د ۲۰۲۰م کال د نوبل د طب جایزه به هاروې التر، مايکل هيوتن او چارلس رايس ته ورکړل شي.
د نوبل کميټې د هئيت له خوا ويل شوي چې دا جایزه د دغو ساينس پوهانو ته د «وينې له لارې د انتقاليدونکي هیپاتايت يا تور زيړي چې یوه ستره نړيواله ستونزه ده، پر ضد مبارزه کې د مهمې لاسته راړونې» له امله ورکول کيږي.
د نوبل کمیټې له خوا ويل شوي چې د درې سرو د کشف له وجې اوس په وينه کې د ويروس د معلومولو ډېر حساس ټيستونه شته چې «د نړۍ په ډېرو برخو کې یي د وينې د ورکړې له لارې خپور شوی هيپاتيت له منځه وړی دی.»
د روغتيا نړيوال سازمان په حواله په ټوله نړۍ کې د هیپاتايت تر ۷۰ ميلیونه زياتې پېښې شته او هر کال کابو ۴۰۰ زره انسانان په دې مرض مړه کيږي. دا مرض د ځيګر د التهاب او سرطان ستر علت دی.
د نوبل دا جایزه د لسو میليونو سويډني کرونو چې ۹۵۰ زره يورو کيږي، نغدي جایزه هم لري.
تیر کال په امريکا کې زيږیدلو ساينس پوهانو ويليم کالين او ګريګ سيمنزه د بريتانوي پيتر راډکلف سره په ګډه د فزيالوجي په برخه کې دغه جایزه ګټلې وه.
د نوبل نورې جایزې چې د فزيک، کيميا، ادبياتو، سولې او اقتصاد په برخه کې د پام وړ لاسته راوړنو له وجې ورکول کيږي، په راتلونکو اووه ورځو کې به اعلان شي.