هند: د اورګاډو ټکر کې کابو ۳۰۰ تنه مړه، ۸۵۰ ټپيان دي
۱۴۰۲ خرداد ۱۳, شنبه
د هند په ختيځ کې د اورګاډو د شرکت يوه استازي وويل چې د کورومندل په نوم ټرين له کلکټې څخه چنای ته په لار و چې د جمعې په ماښام په ځايي وخت ۷ بجې د اوديشا په آيالت کې د هوراه په نوم چټک اورګاډي سره جنګېدلی دی.
د رسنيو په لومړنيو راپورونو کې له يوه باروړونکي اورګاډي سره د کورومندل د ټکر خبره شوې وه، خو په دواړو ريلونو کې د تازه معلوماتو له مخې مسافرين سپاره ول. د ناورين له ځای څخه په اخيستل شوو انځورونو کې ليدل کيږي چې ژغورونکي ډلې څنګه په ژوندي پاتې شوو کسانو پسې ګرځي.
په ټولنيزو رسنيو کې شريکې شوې ويډيوګانې ښيي چې امبولانسونه راځي او دا چې خلک د اورګاډي له چپه شويو ډبو څخه راويستل کيږي. د حکومت په حواله دا د لسو کلونو راهيسې په هند کې تر ټولو سخت د اورګاډو ټکر دی. د تازه خبرونو له مخې د ژغورنې ماموريت اوس پای ته رسېدلی دی او ټاکل شوې ده چې د هند لومړی وزير نرندرا مودي به د پېښې له ځای څخه ليدنه وکړي.
رويټرز/ن.ص./ا.ا.