طالبان: امريکايي چارواکي د داعشيانو شمېر کې مبالغه کوي
۱۴۰۲ فروردین ۴, جمعه
جګپوړو امریکايي جنرالانو ویلي، چې داعش ډله لاهم په افغانستان کې پیاوړی حضور لري.
اړوند مطالب:طالبانو په کابل کې د داعش د دريو غړيو د وژلو خبر ورکړی
منځني ختیځ لپاره د امریکا جګپوړي جنرال مایکل اریک کوریلا د پنجشنبې په ورځ د کانګرس پوځي کمېټې ته ویلي، په ۲۰۲۱ میلادي کال کې له افغانستانه د بهرنیو ځواکونو تر وتلو وروسته د داعش جنګیالي ډېر شوي او پیاوړي شوي هم دي.
هغه ویلي: «داعش نن په افغانستان کې ځواکمن او قوي دی.»
خو د طالبانو د حکومت ویاند د امریکايي چارواکو دا څرګندونې په کلکه رد کړې.
ذبیح الله مجاهد د جمعې په ورځ په خپله ټویټرپاڼه لیکلي:« په افغانستان کې د داعشي ډلې د تعداد په اړه د امریکایي چارواکو څرګندونې حقیقت نه لري.»
مجاهد زیاته کړې: «د امریکایي چارواکو لخوا له دې موضوع سره دلچسپي او د هغوی بزرګنمایي پخپله له داعشي فتنه ګرو سره مرسته او هغوی ته کمپاین دی چې باید ودرول شي.»
د طالب ویاند په ټکو چې دا ډله اوس په افغانستان کې تر پخوا ډېره ځپل شوې ده.