ملتن توپان د فلورېدا لوېديځ ساحل ته رسېدلی

د پنجشنبې په ورځ د امريکا د «هېريکين د ملي مرکز» چارواکو وويل چې ملتن د لومړۍ درجې په توپان بدل شوی دی. توپانونه تل له سمندر څخه ځمکې ته تر رسېدو وروسته خپل ځواک له لاسه ورکوي. خو د شدت پر کمېدو سربیره هم بادونه ډېر چټک وي او په ساعت کې به کابو ۹۰ کیلومترو ته رسېږي. توپان دمګړۍ د فلورېدا ختیځ ساحل کېپ کانېورل ته مخه کړې ده.

ساحل ته تر رسېدو دمخه هم بادونه دومره قوي ول چې کورونه یې زيانمن کړي او نور زيانونه یې هم اړولي دي. تېزو بادونو کښتۍ لا دمخه ساحل ته کش کړې وې.

د فلوريدا په فورت مايرز کې یو ويجاړ شوی کور چې د ملتن توپان په مسير کې پروت وو.

په ساحلي سيمو کې ډېر کورونه هغه وخت ويجاړل شول چې د ملتن توپان ګردبادونه رامنځته کړل. اټکل کيږي چې ملتن به کابو د ۵۰ میليارډو ډالرو زيان ورسوي.

د بي بي سي او سي ان ان او سيمه ایزو رسنيو په حواله د ملتن توپان په سانت لوسي سيمه کې لومړي قربانيان پر ځای پريښي دي. د سيمې د پوليسو د مشر په حواله فورت پيرس ته څيرمه د زړو کسانو د استوګنې په يوخ ځای کې «څو کسانو ژوند له لاسه» ورکړی. زياته شوې ده چې پوليس د بلدوزرونو او نورو وسايلو په کارولو سره د مرستې هڅه کوي. هغه وويل: «ډېره وحشتناکه پېښه وه، هیڅ الفاظ نه لرم.»

په سيمه کې ټول تفريحي پارکونه د چهار شنبې په ورځ تړل شوي دي او نن، پنجشه به هم تړلي پاتې وي. د فلورېدا د اورلاندو سيمه زياتره یې د تفريحي پارکونو له کبله د امريکا متحده ایالاتو د سېلانيانو تر ټولو په زړه پورې ځای دی.

اکواريمونه او ژوبڼونه هم د ملتن توپان د را رسېدو ترمخه تخليه شوي او پکې میشت ژوی بيړنيو سرپناو ته انتقال شوي دي.

يو شمير خلکو د توپان تر رسېدو دمخه هڅه وکړه چې د اړتيا وړ توکې رانيسي. دلته په انځور کې ليدل کيږي چې د تیلو يوه ټانک ته موټرونه په کتار کې ولاړ دي.

پر سړکونو تر هغه وروسته اوږده کتارونه او بیروبار جوړ شو چې په زرونو کسانو خوندي ځایونو ته د تللو له پاره له خپلو کورونو ووتل. د ګازو او تیلو ځينو ټانکونو د سون توکي نه درلودل او د مغازو آلمارۍ هم خالي شوي وې.