ميرکل؛ پر ترمپ د ایلن ماسک نفوذ «ستره انديښه» ده

د آلمان پخوانۍ صدراعظمې انګيلا میرکل، د امريکا د منتخب ولسمشر دونالد ترمپ، او ايلن ماسک، په څېر سياستوالو نفوذ يوه «ستره انديښنه» بللې ده.

نوموړې د ياداښتونو د خپل کتاب تر نشر د مخه نن، د جمعې په ورځ د «ډېر شپيګل» سره په مرکه کې وويل چې د سیاست يوه مهمه او حتمي فريضه د عامو او ځواکمنو وګړو په ګټو کې انډول رامنځته کول دي.

هغې وويل: «که دا انډول د شرکتونو د پانګې د قدرت او يا تخنيکي وړتياو له کبله ډېر زيات اغیزمنيږي نو دا زموږ ټولو له پاره يوه بې ساري ننګونه ده.»

نوموړې د تيسلا او سپيس ايکس د اجرئيوي مشر ايلن ماسک مثال ورکړ چې ترمپ د حکومتي کارګردګۍ دنوې ادارې د ګډ مشر په توګه ټاکلی دی. ترمپ دا خبره هم کړې ده چې ماسک به له حکومتي دایرې دباندې په پاتېدو سره کار وکړي.

انګليلا ميرکل، وويل: «که چېرې د ده په څېر يو کس چې په فضا کې د ټولو سټېلايټونو يا سپوږمکيو د ۶۰ سلنه څښتن دی، نو دا به زموږ له پاره پر سياسي مسئلو سربیره د سترې انديښنې باعث وي.»

سپیس ايکس د سټېلایت انترنت چمتو کوونکې شرکت ستار لنک مالک شرکت دی چې تر چتر لاندې یې په فضا کې تر ۶۰۰۰ ډېر سټېلايټونه موجود دي او په پیرودونکو کې یې شخصي شرکتونه او دولتي آژانسونه شامل دي.

د میرکل د ياداښتونو اړوند کتاب چې «آزادي: يادونه ۱۹۵۴- ۲۰۲۱» تر عنوان لاندې دی، د ترمپ د بيا ټاکل کيدو تر مخه ليکل شوی دی.

دا کتاب به د نوامبر پر ۲۶مه نيټه په تر ۳۰ ډېرو هېوادونو کې خپور شي. میرکل، شپيګل مجلې ته وويل چې د ترمپ، بريا هغه خواشينې کړې ده.

د پخوانۍ صدراعظمې دا کتاب به په دسمبر میاشت کې په امريکا کې د يوه داسې محفل په ترڅ کې خلکو ته معرفي شي چېرې چې به د ميرکل ترڅنګ د امريکا متحده ایالاتو پخوانی ولسمشر بارک اوباما، هم موجود وي.

میرکل په خپل کتاب کې د ترمپ ترڅنګ د روسیې د ولسمشر ولاديمير پوتین، په ګډون د نورو نړيوالو مشرانو سره د خپلو سياسي معاملو په اړه خبرې کړي دي.

د نوموړې پخوانۍ صدراعظمې دا کتاب په داسې وخت کې چاپیږي چې میرکل، د آلمان روانو سياسي او اقتصادي ستونزو او مخ پر پراخیدونکو نړيوالو بحرانونو ته په کتو سره له خپل ۱۶ کلن ميراث څخه د دفاع له پاره له فشار سره مخامخ ده.