له یونان څخه نور مهاجر آلمان ته انتقاليږي

په دغو مهاجرو کي ۴۸ یې له هغو ۱۵۵۳منل سوو مهاجرو څخه دي چي د آلمان حکومت، د یونان په ټاپو کي د موریا کمپ تر سخت سوځیدو وروسته منلي دي.

د جرمني د کورنیو چارو وزارت په حواله په هغوی کي ۱۸ بې سرپرسته تنکي ځوانان هم شامل دي چي سنونه یې د ۱۵ او ۱۷ کلونو ترمنځ دي.

له دغو ۱۸ کسانو څخه پرته له یوه سوریايي نور ټول افغانان دي او باید په آلمان کي یې د پناه غوښتني یوه بله پروسه هم پيل سي. د آلمان حکومتي ائيتلاف په مارچ میاشت کي پر دې توافق وکړ چي د مهاجرو د منلو د یوه اروپايي پروګرام په چوکاټ کي دي د یونان د ټاپوګانو له کمپونو څخه  څو سوه مهاجرو ته د راتګ اجازه ورکړي. په مجموعي ډول باید د وخت په تیریدو سره ۹۲۸ مهاجر راوغوښتل سي چي ۲۴۳ یې ناروغ کوچنیان او تنکي ځوانان دي او پاته نور کسان بیا د هغوی نژدې خپلوان دي.

په هغو ۴۸ مهاجرو کي چي د پناه غوښتني پروسه یې په یونان کي تیره سوې ده، ۲۴ يې کم سنه کوچنیان هم شامل دي. ۱۱ نور یې عراقيان دوه يمنيان، درې د کامیرون، ۷ یې سومالیايان، ۱۵ یې د سوريې او ۱۰ یې فلسطینيان دي.

د نوموړي وزارت په حواله د هغوی د پرواز د اجازې اول شرط د کرونا تيست منفي نتیجه ده. په هانوور کي د رارسیدو سره سم هغوی باید د کرونا یوه بله آزموینه هم ورکړي او د منفي نتیجې تر معلومولو پوري مجبوره دي په قرانطین کي پاته سي. وروسته به دغه نوي رارسیدلي مهاجر د آلمان پر نورو آیالتونو وویشل سي.

له دې ډلي څخه به يې ۱۴ د برلین او نوردراین ویستفالین ایالتونو، ۱۳ باډن وورتیمبیرګ، ۱۰ یې بایرن، ۶ یې تورینګین، ۴ یې نیدرزاکسن، ۳ یې هیسن او دوه به یې راین لند فالز ته واستول سي.

(AG) گ.پ/ن.ز