آلمان: په کرونا د مبتلایانو شاخص بیا ریکارډ مات کړ
۱۴۰۰ بهمن ۵, سهشنبه
روبرت کخ انستیتوت په آلمان کې په کرونا ویروس د مبتلایانو شاخص ۸۹۴،۳ اعلان کړی دی. دغه شاخص تیره ورځ (د جنورۍ ۲۴ نیټه) ۸۴۰،۳ او تیره اونۍ په همدې ورځ ۵۵۳،۲ وو.
په کرونا د مبتلایانو شاخص، د هرو سلو زرو انسانانو پر سر په یوه اونۍ کې په دغه ویروس د نویو مبتلایانو شمیر ښيې.
روبرت کخ انستیتوت د سه شنبې(د جنورۍ میاشتې ۲۵ نیټه) په ورځ اعلان وکړ چې په تیرو ۲۴ ساعتونو کې په کرونا ویروس د نوو مبتلایانو شمیر شاوخوا ۱۲۷ زرو ته رسیدلی دی.
دغه شمیر له تیرې ورځې ۶۴۰۰۰ زیات او د تیرې اونۍ د همدې ورځې په پرته شاوخوا ۵۳ زره لوړ دی.
په تیرو ۲۴ ساعتونو کې ۲۱۴ کسان په آلمان کې په کرونا ویروس د اخته کیدو له امله خپل ژوند له لاسه ورکړی دی.
تر اوسه پورې په دغه هیواد کې د کووید-۱۹ ناروغۍ له امله د مړو شمیر ۱۱۶ زره او ۹۶۰ تنو ته رسیدلی دی.
همدارنګه د کرونا ویروس له کبله د بستر کیدونکو ناروغانو شاخص هم ۳،۸۷ ته لوړ شوی دی. تر اوسه پورې په آلمان کې ۸ میلیونه او ۸۷۱ زره انسانان په کرونا ویروس اخته شوي دي.
آژانسونه: ش.ن/ ن.ز