آسترالیا له افغانستان سره ټېسټ لوبه وځنډوله

د افغانستان او آسترالیا ترمنځ ټېسټ لوبه په نومبر میاشت کې په پرت کې پلان شوې وه چې دا به د دواړو هیوادونو ترمنځ لومړۍ ټېسټ لوبه وای.

د کرونا وبا لا مخکې د دې سبب شوې ده چې آسترالیا د ویسټ انډیز او زمبابوې لوبډلو سره لوبې وځنډوي بلکه سږ کال په دغه هیواد کې د شل اوریزو لوبو نړیوال جام هم نه تر سره کیږي.

خو له هند سره به څلور ټېسټ لوبې، درې یو ورځنۍ لوبې او د شل اوریزو لوبو دري سیریزه ترسره شي. د آسترالیا د کریکټ اړونده چارواکو د څرګندونو له مخې له دغو لوبو ترلاسه کیدونکې پيسې به په راتلونکي کې د آسترالیا کریکټ بورډ له پاره مهمي وي.

خو د افغانستان او آسترالیا ترمنځ د ټېسټ لوبې د ترسره کیدو له پاره کومه مشخصه نېټه نه ده په ګوته شوې.