اشرف غني له مؤقتي حکوت سره موافقې ته اشاره کړې

اشرف غني دغه خبري د تاجيکستان په پایتخت دوشنبه کي پرون سه شنبه (د مارچ میاشتي ۳۰ مه) د افغانستان په هکله د یوه سیمه ایز کنفرانس پر مهال وکړې.

د غني په خبره دغه ډول یو حکومت باید د موجوده انتخابي رهبرۍ او «نورو افغانانو تر منځ» چي مطلب یې کيدای سي طالبانو ته اشاره وي، جوړ سي. غني همېشه د مؤقتي حکومت خبره ردوله. هغه به تل ټینګار کاوه چي قدرت بايد یوازي یوه انتخابي حکومت ته وسپارل سي، تر څو په دې وسیلې سره د هیواد اساسي قانون مراعت سي.

خو په دوشنبه کي د ده د اوسنۍ وینا څخه دا نه معلومیږي چي هغه به په اینده کي کوم رول پرغاړه اخلي. د افغانستان حکومت او طالبان د تیر عیسوي کال له سپتمبر میاشتي راهیسي د سولي مذاکرات پر مخ بیايي.

د دغو خبرو پرمهال پردې هم بحثونه کیږي چي دغه هیواد به د سولي تر یوه ممکنه تړون وروسته څه ډول رهبري کیږي او حکومت به څه ډول تقسیمیږي.

له بلي خوا بیا د امریکا متحده ایالاتو څه موده مخکي د «سولي د جوړیدو حکومت» په نامه د یوه مؤقتي حکوت جوړیدل پیشنهاد کړي وه، په کوم کي چي باید طالبان هم برخه واخلي.

د یوه مؤقتي حکومت تر جوړیدو وروسته باید پر یوه نوي اساسي قانون باندي کار وسي او په اخره کي قدرت تر انتخاباتو وروسته یوه نوي حکومت ته وسپارل سي.

د افغانستان د چارو الماني کارپوه، توماس روټیګ په نظر اشرف غني عملأ د امریکا فشار ته تسلیم سوی دی چي باید د راتلونکي می میاشتي تر اول تاریخ دمخه لا د یوه سیاسي حل سره موافقه وکړي. خو دې هدف ته رسیدل بیا هم اسانه کار نه دی. ځکه چي طالبانو تر اوسه پوري د امریکا متحده ایالاتو د دغه پیشنهاد په باب څه نه دي ویلي.

امریکا تر فشار لاندي ده چي ژر باید عمل وکړي، ځکه چي د پخواني جمهوررئیس، دونالد ترمپ حکومت له طالبانو سره د می میاشتي تر اولي نیټې پوري له افغانستان څخه د خپلو عسکرو له وتلو سره موافقه کړې وه.

د دې په مقابل کي بیا طالبان د افغانستان له حکومت سره مستقیمو خبرو ته حاضر سول. خو دغو خبرو تر اوسه پوري چنداني نتیجه نه ده ورکړې. اوس د دې هیله مندي موجوده ده چي په دغو خبرو کي به په راتلونکي اپریل میاشت کي په ترکیه کي د امریکا په ابتکار د افغانستان پر مسألې یو کنفرانس پر مهال پرمختګ رامنځته سي.