پاپ فرانسيس د اوکراين او نورو جګړو د بندېدو غوښتنه وکړه

د کاتوليکي کليسا مشر، پاپ فرانسيس، د روم په سان پېتر ميدان کې د تقريبا سل زرو مسيحي پلويانو په حضور کې وويل چې »موږ تر حده زياته وينه تويونه او تاوتريخوالی ليدلی دی.«

فرانسيس وويل چې »زموږ زړونه له وېرې او ترهې څخه ډک دي کله چې زموږ دومره ډېر ورونه او خويندې اړ وي چې ځانونه پټ کړي څو له بمونو څخه يې ځان ژغورلی وي.« په واټيکان کې د ايستر د سږنيو مراسمو تر ټولو مهمه موضوع د اوکراين جګړه ده. اوس د کرونا پانديمۍ د شروع کېدو راهيسې تر ټولو لږ کرونايي تدابير او بنديزونه هم لګول شوي ول.

پاپ وويل چې »د هيلې نوی سباوون دې د ربړې او مرګ د وحشتناکې شپې د پاسه راپورته شي« او دا چې دی د هغو اوکرايني قربانيانو او په ميليونو کډوالو په هکله فکر کوي چې فاميلونه يې سره جلا شوي او ژوند يې ويجاړ کړل شوی دی. پاپ همداراز په نوره نړۍ کې د جګړو او شخړو يادونه وکړه، په تېره په لنبان، سوريه، يمن، عراق، افغانستان، ليبيا، ميانمار او د افريقا په ځينو برخو کې. د پاپ په خبره »سوله ممکنه ده، سوله يوه وجيبه ده او سوله د هر چا لومړنی مسئوليت دی.«

آ./ن.ص./ا.ا.