ملالي خپله کاليزه له عراقۍ نجونو سره ولمانځله

ملاله عراق ته ورغله. په دغه انځور کي ليدل کيږي چي هغه له عراقيو نجونو سره په ټال کي څرخونه وهي.

دغه انځورونه د ملاله فنډ له خوا پر ټويټر پاڼه خپاره سوي دي. له دغه انځور سره ليکل سوي دي چي د عراق دغو نجونو نه سوای کولای چي ښوونځي ته ولاړي سي، خو اوس آزادي دي او ښوونځيو ته ځي. هغوی د ملاله ۲۰ کليزه له هغې سره ولمانځله.

د ملاله فنډ په وينا ملالي د روان کال په اپريل مياشت کي د نړۍ ځينو هيوادونو ته سفرونه پېل کړي، چي هلته له نجونو سره ملاقاتونه وکړي او هغوی ته حوصله ورکړي.

ملالي خپل سفر د امريکا له لنکاسټر ښار څخه پېل کړ. هغې هلته له پناه غوښتونکو او مهاجرو سره ملاقاتونه وکړل. هغې له هغو مهاجرو سره هم خبري وکړې چي خپل کاروبارونه يې پيل کړي دي. لنکاسټر ښار له ۲۰۱۳م کال راهيسي ۱۳۰۰ پناه غوښتونکو ته ځای ورکړی دی.

«ګرل پاور» يا د نجونو قوت په نوم د ملالي د سفر دويم پړاو کاناډا وو. ملالې هلته له لومړي وزير او يو ځينو نورو کاناډايي مشرانو سره وکتل. ملالې په دغه سفر کي له نجونو سره ملاقاتونه وکړل او پر دې يې ټينګار وکړ چي د نجونو تعليم د ښه راتلونکي ضامن دی.

ملاله د خپلې کليزي پر وخت و عراق ته ورغلې. هغې په عراق کي د بيځايه سوو کورنيو له نجونو سره خپله کليزه په يوه پارک کي ولمانځله.