طبیعي خواړه په ورزش کې د ډوپينګ ځای نیسي

د بایسکل چلوونکو په برخه کې د برمنګهم څیړنیز پوهنتون څیړنې ښيې چې د کاربوهایدریت لرونکو خوړو له ترکيب (په شیدو، میوو، حبوباتو او سبزیجاتو کې د موجودې شکرې، نشایستې او فیبر) او فرکتوز(په میوو کې طبیعي خوږه لرونکي مواد) څخه په استفادې سره یي د بدن توان ۸ سلنه زیات شوی دی. له همدې امله د بدني ورزشونو پر مهال له غلو دانو لرونکو موادو څخه استفاده ډیره ګټوره ده.

د بریتانيا د اکستر پوهنتون د څیړنو پر بنسټ د چغندر د اوبو څښل د بدن مقاومت تر ۱۶ فیصدو پورې زیاتوي. په چغندر کې موجود مواد عضلانو ته د ضرورت مطابق اکسیجن په رسولو کې مرسته کوي او د ویني جریان ښه کوي.

د وروستیو تحقیقاتو پر بنسټ کورکمن په بدن کې د التهاب او ګزک مخه نیسي. له تور مرچو سره یوځای له کورکمن څخه استفاده د د دې موادو دارویي خاصیت زیاتوي. په کورکمن کې موجود د التهاب ضد مواد په چټکۍ سره د بدن د بیارغونې سبب کیږي او عصبي فشار هم کموي.

کافئن هغه مواد دي چې په لنډه موده کې د انسان تمرکز، جسمي او رواني توانایي زیاتوي. په همدې دلیل د بدن د هر کیلو ګرام وزن په نتاسب په مناسبو وختونو کې له ۳څخه تر ۴ ملي ګرامه کافئین څخه استفاده د دې سبب کیږي چې بدن تر ډیره وخته پورې خپل استقامت وساتي. خو له کافئن څخه تر اندازې زیاته استفاده خطرناکې پایلې لرلی شي چې کیدای شي د زړه ضربان د زیاتیدو، د عضلاتو د لړزې او عصبي اختلالاتو سبب شي.

تیز رنګه یا تریخ شوکلات په وينه کې د اکسیجن جذب کموي. له ورزشي تمریناتو او بدني کار مخکې د یو تخته شوکلات خوړل د بدن استقامت زیاتوي. همدارنګه په ککوو کې موجود تئوبرومين لکه د کافئین په څیر په بدن کې د انرژۍ د زیاتیدو سبب کیږي.

جینسنګ چې په عربي کې د دې ګیاه ریښې ته «جنسه» او په انګلیسي کې ورته Ginseng وایي له کلونو راهیسې د چين په یوناني طب کې کارول کیږي. دغه ریښې په زیاته اندازه اوسپنه او مګنیزم لري چې د انسان په خوشحاله ساتلو او د تمرکز په زیاتولو کې مرسته کوي. له تمریني ورزشونو څخه مخکې او یا تر یوه جنجالي ورځي وروسته، له دغو ریښو څخه استفاده لکه د ډوپينګ له موادو څخه د استفادې په ډول انرژي تولیدوي.

بادام ۲۴ سلنه پروتيني مواد لري چې د عضلاتو په رغونه کې ډیره مرسته کوي. سربیره پر دې بادام د ویټامين ای او معدني موادو درلودونکی دی چې د مغز او بدن د دفاعي سیستم د تقویه کیدو سبب کیږي. د بادام ګټور غوړ د بدن توان زیاتوي او ستړتیا کموي.

آووکادو د ویټامين A درلودونکی دی چې د بدن د حجرو په وده کې مرسته کوي. دا د ګټور او غیر مشبوع شوي غوړ غني منبع ده. سربیره پر دې د ویتامين B1 او B6 درلودونکی دی چې د اعصابو په آرامولو او د بدن د حجرو په ترمیم کې مرسته کوي.

د ګيلاس له یوه پیاله اوبو څښلو سره کولی شي د عضلاتو له درد او شخیدو مخه ونیسئ. د ګيلاس اوبه په مستقيم ډول انرژي تولیدونکې ماده لري. د علمي څیړنو پر بنسټ هغه کسان چې په اونۍ کې له یو وار څځه ډیر ورزش کوي کولی شي د ګيلاس په یوې پيالې څښلو سره د عضلاتو د شخ پاتی کیدو له ستونزې څخه مخنيوی وکړي.