طالبانو ۴۰ کسان د غيرقانوني مهاجرت په تور نيولي دي
۱۴۰۰ بهمن ۵, سهشنبه
ځايي رسنیو ويلي دي چې دغه افراد په مزارشریف ښار کې د مولانا جلال الدین محمد بلخي په نړيوال هوايي ډګر کې نيول شوي دي.
د طالبانو ویاند ذبیح الله مجاهد وویل چې دغه افراد د موقتي تحقیقاتو له پاره نيول شوي ول او وروسته بیرته خوشي شول.
د مجاهد په خبره يو شمیر ښځې لا هم په توقیف کې دي ځکه چې د هغوی د کورنیو غړي نه دي راغلي چې دغه ښځې خپلو کورونو ته بوځي.
د طالبانو د حکومت ویاند وویل چې د هغو ښځو له پاره چې لا هم په توقیف کې دي، لازم انتظامات نیول شوي دي، خو نور جزيات يې ور نه کړل.
د آلمان خبري آژانس چې دغه رپوټ يې تيره شپه ناوخته ورکړی، لیکلي چې دا لومړی ځل دی چې طالبان په رسمي توګه تائيدوي چې دوی بهر ته له تللو څخه د خلکو مخنیوي کوي. خو دا چې دغه افراد کوم هیواد ته تلل دغه آژانس يې په اړه څه نه دي ويل شوي.
طالبانو په وروستیو میاشتو کې له افغانستان څخه بهر ته د وتلو ټول پروازونه د ځینو مسائلو له مخې متوقف کړل.