د ژوند له پاره د نړۍ تر ټولو ښه ښارونه

له ټولټال سلو څخه د ۹۹،۱ درجه بندۍ د نمرو په ترلاسه کولو سره ويانا په پرله پسې دويم ځل د ژوند له پاره د نړۍ تر ټولو ښه ښار وبلل شو. د اتريش دا پلازمينه د نورو شرکتونو له خوا په ترسره شويو نظر پوښتنو کې هم مخکې وه.

په ۲۰۱۸م کال کې تر هغه مخکې چې ويانا یې ځای ونيسي، ميلبورن ښار د «Global Liveability Index» د نوملړ په سر کې وو. په ۲۰۱۹م کال کې د ۹۸،۴ نمرو په اخيسلتو سره په نوملړ کې يو څه راکښته شو، خو د روغتيا، زده کړو او زیربنا په برخه کې یې پوره ۱۰۰ نمرې ترلاسه کړي دي. د خپل غوړيدلي هنر له کبله دا ښار په څو ځلي د استرليا د کلتوري مرکز په توگه نومول شوی.

د سروې او وړاندوينې د مرکز «The Economic Intelligence Unit» په حواله سدني د اقليم د بدلون د اغیزو د کمولو له پاره د هلو ځلو او د کلتور او چاپيريال په برخه کې پرمختگ له کبله سږ کال د پنځم مقام څخه دريم ته رسېدلی دی.

اوساکا له درېيم مقام څخه سږ کال څلورم مقام ته کښته شوی دی. تر ۲۰۱۸ م کال پورې دا کال د لسو ښو ښارونو په نوملړ کې نه وو شامل. خو د جرمونو په کچه کې کمښت او د ترانسپورت د معيار عمومي پرمختگ د دې باعث شول چې دا ښار د ژوند له پاره ښه وبلل شي. دا بندري ښار د جاپان د پياوړو اقتصادي ښارونو څخه يو دی او تر توکيو وروسته تر ټولو ستر تجارتي ښار دی.

که څه هم چې دا ښار سږ کال له څلورم څخه پنځم مقام ته ښوېدلی خو کالگاري په ټوله شمالي امريکا کې د ژوند له پاره بهترين ښار دی. دا ښار چې ۱،۳م ميليونه انسانان پکښې ژوند کوي، د ژوند د ښه معيار له پاره شهرت لري.

وينکوور له ۲۰۰۲ تر ۲۰۱۰ م کال پورې او بيا په ۲۰۱۵م کال کې د ژوند له پاره د تر ټولو ښو ښارونو په نوملړ کې لومړی مقام خپل کړی وو. خو د يو څو پواينتونو په بایللو سره اوس دغه ښار د روغتيا، کلتور، چاپيريال، زده کړو او زيربنا په برخو کې مخکښ دی.

تورنتو د ۹۷،۲ نمرو په اخیسلتو سره په دې نوملړ کې اووم ځای لري. د کاناډا دا تر ټولو زيات نفوس لرونکی ښار د نړۍ د تر ټولو څو کلتوري معاصر ښار په توگه نومول شوی دی. د ښار ۵۱ سلنه وگړي له کاناډا دباندې زيږيدلي.

د ۲۰۲۰م کال اولمپيک لوبو په درشل کې دې کوربه هېواد ډېر تغير وکړ او د ۹۷،۲ نمرو په ترلاسه کولو سره یې ځان په لومړيو لسو هېوادونو کې شامل کړ. توکيو د نړۍ د تر ټولو خوندي ښارونو څخه يو دی او سيلانيان دلته په يوه ستر ښار کې له يوه پلوه ډېر عصريتوب تجربه کوي او له بله پلوه زاړه دودونه هم مشاهده کوي.

کوپنهاگن تر ويانا وروسته يوازنی اروپايي ښار دی چې د ژوند له پاره د لسو ښو هيوادونو په نوملړ کې شامل دی. د ژوند پر نسبتاً لوړ لگښت سربیره هم د دنمارک دا پلازمينه ډېر ښه زیربنا او روغتيايي خدمات عرضه کوي. تمه کیږي چې دا ښار به د بايسکل چلوونکو له پاره د نړۍ تر ټولو ښه ښار وگرځي.

د اديلايد ښار سره د لسو ښارونو په دې نوملړ کې د استرليا د ښارونو شمير درو ته رسېږي. د ۱،۳ ميليونه وگړو په لرلو سره په اصطلاح د کليساو دا ښار له نورو سيالو ښارونو څخه ډېر کوچنی دی، خو د انگورو د باغونو، طبيعي سواحلو او ښو خوړو له کبله یې شهرت ورځ تر بلې زياتيږي.