د پاریس سړه هوا او په خېمو کې د مهاجرو ژوند

دا د پاریس په څنډه کې د افغان او نورو مهاجرو یو مؤقتي کمپ دی. خیمې يې واورو پوښلي دي او په خېمو کې پراته نه پوهیږي چې څومره وخت کولی شي له دغه وضعیت سره مقابله وکړي. په خېمو کي زياتره پراته کسان افغان مهاجر دي.

دا هیڅ د حیرانتیا وړ خبره نه ده چې پولیس او یا خلک دغه مهاجر دي اړ باسي چې دغه ځای پریږدي. هغوی کله نا کله خپل ځایونه بدلوي. د فرانسې په کاله سیمه کې په خپل سر د جوړ شوي مهاجر کمپ له بندیدو وروسته ډیر شمیر مهاجرو پاریس ته مخه کړه.

د بشري حقونو او د مهاجرو د حقونو مدافع سازمانونه زیاتره وخت په دغه خیمو کې د مهاجرو د وضعیت په هکله انديښنه څرګندوي. دغو مهاجرو د «سنت مارتین» کانال دواړو خواوو ته خیمې وهلي دي. د ځایي اوسیدونکو له پاره دغه وضعیت منل هم آسانه کار نه دی.

مرستندویه سازمانونه هم په دغو خیمو کې د ځوانو مهاجرو د وضعیت په هکله اندیښمن دي او مهاجر له بیلا بیلو خطرونو سره مخامخ دي. هغوی پیسې، خواړه ګرم کالي نه لري. سږ کال د اروپا ژمی یو له سړو ژمو شمیرل کیږي.

دا چې په کاله کې د «ځنګل» په نوم د کمپ تر تړلو وروسته بریتانيا ته په غیر قانوني توګه د رسیدو چانس ډیر کم شوی دی، خو بیا هم دغه مهاجر په دې هڅه کي دي چې ځانونه بریتانيا ته ورسوي.

ماښام مهال سړی کولای شي چې د پاریس په څنډه کې ډیر مهاجر په دغه کمپ کې وویني. د ورځې په اوږدو کې ځوان مهاجر تیت او پرک کیږي او د شپې د خوب له پاره بیرته خپلو خیمو ته راستنیږي.

کله چې د شپې هوا سړیږي، هغوی اور بلوي او پر اور راټولیږي. په دغه ځای کې د اور لګیدنې احتمال هم کم نه وي. مهاجر تختې او یا نور هغه څه چې د سوځیدو وړ وي، سوځوي څو خپل ځانونه ګرم وساتي او د ژمې شپې سبا کړي.

کله نا کله د شپې مهال د سیمې ځینې اوسیدونکي او یا هم خیریه ټولنې دغو مهاجرو ته ګرمه ډوډۍ راوړي. کله له هغوی سره خبري کوي او یا ترې د هغوی ستونزي پوښتي. دا چې دغه کړاو به کله پای مومي لا معلومه نه ده. فرانسې تر مخه هم هڅه کړې چې دغه ډول کمپونه د بشري دلایلو له کبله وتړي.

ویل کیږي چې په کمپونو کې د کافي ځای د نشتوالي له کبله مهاجر مؤقتو کمپونو ته انتقال شوي وو، خو بیا هم خیمو وهلو ته اړ شول. خو یو شمیر مهاجر دغو کمپونو ته د مهاجر په توګه د نوم ثبتیدو له کبله هم نه ځي. خو هغه څه چې روښانه دي دا دي چې انسانان په سخته یخنۍ کې په خیمو کې ژوند کوي چې په دې شپو ورځو کې په پاریس کې د تودوخې درجه منفي څلور سانتي ګراد ته رسیږي.