د نړۍ مهم خبرونه له متن او انځور سره

د امریکا د متحده ایالاتو له لوري د ننګرهار ولایت د اچین پر ولسوالۍ باندې د ستر غیر اټومي بم تر غورځولو وروسته، د افغانستان د ملي دفاع وزارت په حواله د دې برید په پایله کې د داعش ترهګرې ډلې ۳۶ جنګیالي وژل شوي دي. د دې وزارت د خپرې شوې اعلامیې په اساس، په دې پیښه کې هیڅ ملکي تلفات نشته خو ترځمکې لاندې د داعش ډلې تونلونه تخریب شوي دي.

د شمالي کوریا د اتومي او توغنیدو د پروګرامونو پر سر د کړکیچ له امله، چین د دې حالت د ډیر خرابوالي په هکله خبرداری ورکړی او په اړوندو خواوو یې د زغم او له احتیاط څخه د کار اخیستو لپاره غږ کړی. د چین د بهرنیو چارو وزارت وانګ یي په پیکنګ کې له خپل فرانسوي سیال ژان مارک ایرو سره له کتنې وروسته وویل چې مخکې له دې چې حالات له کنټروله ووځي، چین د متقابلو پارونو او تهدیدونو د پای ته رسولو غوښتونکی دی.

د سوریې د حکومت او یاغیانو ترمنځ تر توافق وروسته، زرګونه ملکي کسان د څلورو محاصره شوو ښارونو څخه خوندي ځایونو ته انتقال شوي دي. بلې خواته بیا د مضایا او زبداني له ښارونو څخه تقریبا ۶۰ بسونه چې ۲۳۰۰ کسان پکې سپاره وو، نورو خوندي ځایونو ته انتقال شوي دي. په عین وخت کې د یاغیانو تر ولکې لاندې فوعه او کفرایا ښارونو څخه تقریباً په ۷۵ نورو بسونو کې چې ۵۰۰۰ کسان کیږي نورو خوندي ځایونو ته ایستل شوي دي.

د عیسویانو د ایستر د اختر چې په عربې ورته «یوم القیام» هم وايي، په مناسبت نن د جمعې په ورځ ۱۴ کسانو په فلیپین کې ځانونه په صلیب وځړول. د یوم القیام د لمانځنې لومړې ورځ د عیسویت په دین کې د یوم الآم په نامه یادیږي چې حضرت عیسی پر صلیب ځوړول شوی دی. دغه ورځ په ټولې مسیحی نړۍ کې لمانځل کیږي. د حضرت عیسی د صلیب په یادون په فلیپین کې ځینی مذهبی خلک هم ځانونه ځوړندوی.

د فرانسې دبهرنو چارو وزیر، ژان مارک آیرو د سوریې پر ولسمشر بشار الاسد باندې تور پورې کړی چې د کیمیاوي ګازونو په هکله یې دروغ ویلي دي. آیرو چې اوسمهال له چین څخه لیدنه کوي همدا راز ټینګار وکړ چې په دې هکله د اسد څرګندونې دروغ او پروپاګند دی. بشار الاسد تر دې مخکې ویلي وو چې د سوریې د خان شیخون په ښار باندې د کیمیاوي موادو برید دروغ دي او سوریې تر دې مخکې خپلې ټولې کیمیاوي وسلې سپارلي دي.

د ترکیې د انادولو خبري آژانس د رپوټ په حواله، د ترکیې پولیسو د اسلامي دولت یا داعش ډلې پنځه تورن پلویان نیولي دي. ویل کیږي چې دې کسانو د یکشنبې ورځې د ټولپوښتنې پرمهال د یوه ستر ترورسیتي برید پلان طرح کړی وو. ترکیه د یکشنبه په ورځ د اساسي قانون او له پارلماني نظام څخه ریاستي نظام ته د بدلون په هکله یوه ټولپوښتنه تر سره کوي. دغه ټولپوښتنه تر سختو امنیتي تدابیرو لاندې ترسره کیږي.