خوست: د کرونا سربيره، د اختر په لمانځه کې د خلکو پراخ حضور

په خوست ولایت کې د اختر لمونځ داسې مهال ادأ شو چې د خوست په شمول په ټول هیواد کې د کرونا مثبتې پیښې ورځ تر بلې د ډیریدو په حال کې دي.

د اختر تر لمانځه وروسته اختر مبارکۍ، خو ټولنيز واټن مراعاتيږي.

په خوست ښار کې د اختر لمونځ په خلاص ميدان کې د خلکو تر منځ د لازمې فاصلې په رعایت ترسره شو.

خلک هڅه کوي چې د کرونا له امله يو بل ته د اختر مبارکۍ پر وخت لاس او غيږ ورنکړي.

د خوست والي حلیم فدايي د اختر لمانځه پر وخت خلکو ته وويل چې سږکال به د کرونا له امله اختر کمرنګه وي، خو د طالبانو له خوا د اختر په ورځو کې د اوبند په اعلان سره به اختر خوندور شي.

د خوست اوسیدونکي هم سږني اختر ته خوښ دي او وایي چې هیلې یې په ژوندي کیدو دي، ځکه چې د افغان حکومت او وسله والو طالبانو ترمنځ اوربند به په هېواد کې د دایمي سولې پیل وي.

د خوست د عامې روغتیا رئیس ډاکټر حبیب شاه انصاري له دویچه ویله سره په خبرو کې له خلکو وغوښتل، چې سږ کال له کلتوري او دوديزو اختريزو لمانځلو تېر شي.

د خوست امنیتي مسئولینو د اختر د لمانځه پر وخت وويل چې د خوست په هیڅ سیمه کې تر اوسه د نا امنۍ کومه پېښه نه ده رامنځته شوې.

د خوست یو اوسيدونکی کریم الله دويچه ويله ته وويل: «زموږ کورنۍ پريکړه کړې ده چې سږ اختر په کور کې تېر کړو.»

د اختر لمونځ د ادا کولو په سيمه کې چای، کيک، کلچې او مټايان راوړل سوي او که د چا ورته زړه کيږي چې استفاده ورڅخه وکړي.