ترمپ په نيوهمپشايرکي د جمهوري غوښتونکو په ټاکنو کي بريالي سو

۷۷ کلن دونالډ ترمپ د سه شنبه په ورځ د خپلي يوازينۍ سيالې، د ملگرو ملتو پخوانۍ سفيرې نيکي هيلي، پر وړاندي په نيو همپشاير ايالت کي د خپل گوند په مهمو مقدماتي انتخاباتو کي بريالی سو او د شميرو له مخي يې تر نيمايي ډيري رايي ترلاسه کړي دي. هغه په دې ډول شاوخوا لس سلنه تر دغي ۵۲ کلنې کانديدې مخکي سو. هيلي، نوموړي ۷۷ کلن ته مبارکي ورکړه خو اعلان يې وکړ چي خپلي مبارزې ته به ادامه ورکړي.

د تلويزيوني وړاندوينو او د څه د پاسه ۶۰ سلنه رايو د شمېرلو له مخي، ترمپڅه ناڅه ۵۴ او هيلي شاوخوا، ۴۴ سلنه رايي گټلي دي. د چارواکو په حواله په ټاکنو کي د خلکو گډون ډير زيات وو.

ترمپ د خپلي بريا په مناسبت وينا کي پر ولسمشر جو بايدن باندي يرغل وکړ او هغه يې د امريکا په تاريخ کي (تر ټولو خراب ولسمشر) وباله.

جمهوري غوښتونکو، د امريکا متحده ايالات له زوال او ناکامۍ سره مخامخ يو هيواد وباله. ترمپ همدارنگه هيلي ته هم په خطاب کي وويل، که مقدماتي انتخابات ستاسو ايالت ساوت کارولاين ته ورسيږي، «موږ به هغه په آسانۍ سره وگټو».

۵۲ کلني هيلي وويل چي ولسمشرۍ ته د کانديديدو له پاره مبارزه لاهم پای ته نه ده رسيدلې. هغې زياته کړه: «په سياست کي تر ټولو پټ راز په دې کي دی چي ديموکراتان څومره غواړي د ترمپ په وړاندي راڅرگند سي. د ترمپ کانديديل به د بايدن بری وي.»

هيلي په نيو همپشاير کي د يوې حيرانوونکې پيښې تمه درلوده. هغې پر دې ټينگار کړی وو چي ښايي په دغه ايالت کي په خپلواکه توگه راجستر سوو رايه ورکوونکو ته هم اجازه ورکړل سي چي په مقدماتي ټاکنو کي برخه واخلي، کوم چي د هغې په څير د معتدلو سياستوالو ملاتړ کوي.

د امريکا ولسمشر جو بايدن وويل، اوس دا معلومه سوه چي ترمپ به د جمهوري غوښتونکو کانديد سي. «او زما پيغام اولس ته دادی چي گواښونه نه سي کيدای لاپسې ډيري سي. زموږ ډيموکراسي. زموږ شخصي آزادي.»

ترمپ د هغه په وړاندي د څلورو تورونو په گډون پر ډيرو قضايي ستونزو سربيره لا هم د پخوا په شان ډير محبوب دی. هغه تيره اونۍ لا په لووا ايالت کي د جمهوري غوښتونکو مقدماتي انتخابات وگټل.

په نيو همپشاير کي په دغه بري سره نوموړي ۷۷ کلن په نووامبر کي د ولسمشرۍ په ټاکنو کي د خپل گوند د نوماندۍ پر لور يو بل گام هم مخته سو. په لومړنيو دوو ايالتونو کي په مقدماتي ټاکنو کي تر بري وروسته، د جمهوري غوښتونکو هيڅ کانديد د ولسمشرۍ له پاره سيالۍ کي ماته نه ده خوړلې.

په امريکا کي ولسمشري انتخابات د نووامبر پر ۵ مه ترسره کيږي. ديموکراتانو د سې شنبې په ورځ په نيو همپشاير کي غير رسمي مقدماتي ټاکنې ترسره کړې چي بايدن په هغه کي بريالی سو او په سمبوليک ډول مخته سو. نوموړی ولسمشر به په خپله انتخاباتي مبارزه کي يو وار بيا د جنين د سقط کيدو د حق موضوع رامخته کړي، پر کومي چي ديموکراتان په ۲۰۲۲م کال کي په منځمهاله ټاکنو کي بريالی سوی وو.

سربيره پردې ډيري سياستوال او د ډيموکراټانو پلويان په دې باور دي چي بايدن د ۸۱ کالو عمر په لرلو سره بيا هم د ولسمشرۍ له پاره يو مناسب کانديد دی. هغه په اوس وخت کي د امريکا په تاريخ کي تر ټولو ډير عمر لرونکي ولسمشر دي. بايدن په ۲۰۲۰م کال کي د ولسمشرۍ په ټاکنو کي د ترمپ په وړاندي چي له رسواييو او گډوډيو ډکه څلور کلنه دوره يې تيره کړه او لا هم په ټاکنو کي د بايدن بري په رسميت نه پيژني، بريالي سو.

GP/NZ/AG