ترمپ يوازي »بشپړ ځلانده« مهاجر غواړي

د امريکا متحده ايالاتو جمهور رئيس دونالد ترمپ د سپيني ماڼۍ د گلابو په باغ کي د خپل دغه پلان د معرفي کولو پر وخت وویل، چي نړۍ به د امريکا متحده ايالاتو د مهاجرت سیاست د نوي ماډل په مقابل کي په حیرت کي سي.

دغه خبره لږ تر لږه د ترمپ د مهاجرت سیاست له نوي پلان څخه څرگنديږي. خو له دغي طرحي سره ديموکراټانو مخالفت ښکاره کړی دی. د ترمپ د نوي طرحي مطابق باید غيرقانوني مهاجر متوقف او د مهاجرت داسي یو سیسټم رامنځته سي، چي یوازي د یو چا استعداد او توانايي پکښي په پام کي ونیول سي. معنی داچي باید ځوانانو، ښه مسلکي کسانو، چي انگلیسي ژبه یې زده وي او د امريکا په متحده ايالاتو کي ورته د کار وړاندیز سوی وي، ترجیح ورکړل سي.

په نوې طرحه کي همدارانگه راغلي دي چي مخکي تر دې چي څوک د امريکا متحده ايالاتو ته دراتگ اجازه پیدا کړي، اول باید په امریکا کي د پاتيدو او اقامت یو امتحان ورکړي.

گرین کارت یوازي د ښو مسلکي کسانو له پاره

ترمپ په واشنگټن کي دا هم وویل چي د مهاجرت سیاست په نوي پلان کي لوی بدلون د ښو مسلکي کسانو فیصدي ده، چي امريکا متحده ايالاتو ته پرې ښول کیږي.

د هغه په خبره هغوی به د اوس ۱۲ فیصدو څخه ۵۷ فیصدو ته لوړسي او شاید دغه فیصدي نوره هم لوړه سي. د ترمپ په نوې طرحه کي کارځایونه، معاشونه او د امریکايي کارگرانو ضمانت لومړيتوب لري.

ترمپ یووار بیا پردې باندي انتقاد وکړ چي د مهاجرت سیاست د اوسني سیسټم مطابق يوازي هغه کسان امریکا ته داخلیدلای سي چي «هلته یې د فامیل غړي اوسیږي». تر اوسه پوري ددغه سیسټم مطابق امریکا ته له کاله د ۱،۱ ميلیون داخلیدونکو کسانو دوه پر دریمه برخه يې فامیلي دلایل لري.

خو ترمپ د تقریباً هغو ۱۱ ميلیونو مهاجرو خبره ونه کړه چي اوس په امریکا کي په غيرقانوني ډول سره اوسیږي او سمي اقامې نه لري.

کوشنر او مویلر ددې پلان تر شا دي

د دغه پلان اصلي طراحان د ترمپ زوم جارید کوشنر او د هغه مشاور ستیفین مویلر دي، کوم ته چي د مهاجرت په سیاست کي د ډیر سختگیره شخص په سترگه کتل کیږي. او دقیقاً په همدې دلیل ديموکرات ګوند ورسره مخالفت کوي.

هغوی اعلان کړی دی، چي د دغي طرحي ملاتړ به و نه کړي. د دوی په خبره دا هم هغه سخت گیرانه سیاست دی، چي د ترمپ حکومت په تیرو دوو کلونو کي هم تعقیب کړی دی. ترمپ په کانگرس کي د ديموکراټانو رايي ته اړ دی، ځکه چي هغوی د نمایندگانو په مجلس کي اکثریت لري.

زموږ د آرشیف څخه یو انځوریز البوم:( 19.06.2018)