آیا په آلمان کې کډوال ښځینه پولیسو ته بې احترامي کوي؟
۱۳۹۴ مهر ۲۲, چهارشنبه
تانیا کمبوري په دې وروځو کې ډیرې مرکې کوي او په یوې مرکې کې یې ویلي دي چې د هغې د ورځیني ژوند یوه برخه دا ده چې هره ورځ له سپکاوي، بدو خبرو، وهل کیدو او ټیلو سره مخامخیږي. کمبوردي وایي چې هغې ته د یوې ښځینه پولیسې په ډول احترام نه کیږي، او زورول کیږي.
دا میرمن په خپل کتاب کې «آلمان تر شنې رڼا لاندې- د یوې ښځې بیړنۍ غوښتنه» کې لیکي دي چې د حکومت اجراییوي ځواک د له منځه تلو په حال کې او د پولیسو پر وړاندي تاوتریښوالی د ډیریدو په حال کې دی. د دې کتاب یوناني الاصله لیکواله وایي چې مسلمان کډوال د دې تاوتریښوالي یوه لویه برخه جوړوي. ایا دا یوازې د یوې ښځینه پولیسې لیدلوری دی او که په رښتیا هم د اندیښنې وړ داسې یو بهیر رامنځته شوی دی چې د ټولني ستنې لرزوي؟
د کارپوهانو له خوا د دې کتاب منتقدانه ارزونه
د جرم پیژندنې پلټونکی بنسټ د آلمان په نیدرزاکسن ایالت کې په ۲۰۱۲کال کې د ښځینه پولیسو پر وړاندې د تاوتریښوالي په اړه پلټنې کړي او په دې اړه ۱۸۴۴۳تنو پولیسو معلومات وړکړي دي. د هغوی د معلوماتو له مخې د مسلمانو کډواله کورنیو د ځوانانو له خوا تاوتريښوالی تر یو حده ډیر ښودل شوی. دا تاوتريښوالی په مختلفو ډولونو تر سره شوی لکه پر پولیسو باندې چیغي وهل، په لغته وهل، د چړې حملې، وارونه او کوزارونه کول.
ښځینه پولیسو د دې بنسټ غړو ته ویلي دي چې هغوې ته کم احترام کیږي خو د نارینه همکارانو په تناسب یي پر دوې کمې حملې کیږي. دا هغه څرګندونې دې چې ښایي تانیا کمبوري هم ورسره هم نظره وي.
د جرم پیژندنې په برخه کې د ماکس پلانګ پلټونکي بنسټ دا ثابته کړې ده چې معمولا ترکي ځوانان پر پولیسو ډیر باور لري او له همدې کبله ډیر کم وخت هغوی له پولیسو سره فزیکي برخورد کوي. د کډوالی په برخه کې پلټونکې ورنر شیفاور، وايي: «ډیری آلماني مسلمانان د تاوتریښوالي خلاف دي.»
د کډوالی په برخه کې یو بل پلټونکی کلاوس، په دې اړه وایي: «د ادغام پروسه له هغه څه چې خلک یې فکر کوي په ډیر ښه شکل روانه ده.» پلټونکي په دې اړه فکر کوي چې د کډوالی له ډیریدو سره سم به د پولیسو پر وړاندې تاوتریښوالی تر کومې کچې پورته شي.
د پولیسو پر وړاندې د کډوالو چلن د ټولنې لپاره خطر؟
آلماني جرم پیژندونکی کریستان والبورک، له ۲۰۰۲کال څخه راهیسي د دوه تنکې ځوانان چې هغه وخت ۱۳کلن وو څاري. والبورګ د دې ځوانانو د تاوتریښوالي او له پولیسو سره د بد چلن په اړه هم څیړنې کوي. هغه له دویچه ویله سره په خبرو کې وویل: «موږ د میلمه کارګرو په دوم او دریم نسل کې د جرم او تاوتریښوالي شاهدان یو. خو دا بهیر د ټولو منابعو پر بڼه اوس د کمیدو په حال کې ده.»
والبورګ زیاتوي چې که څه هم په دویسبورګ ښار کې ۲۰سلنه ځوانان ترکان دي خو د ترکي او د هغوی آلماني همزولو تر منځ کوم خاص توپیر نه شته.
د کریستان والبورګ په وینا د کډوالو له کورنیو څخه ۵یا ۶سلنه ځوانان پولیسو ته بې احترامي کوي او په آلماني اوسیدونکو کې هم همدا شمیر ځوانان دا کار کوي.
د کډوالی پلټونکي په دې اړه له هغه سره هم نظره دي. خو هغوې وایي چې دا ستونزې په هغو کورنیو کې رامنځته کیداې شي چې پرې دودونه حاکم وي، اجتماعي او کاري اړیکې یې کلکې نه وي. هغوې په دې باور دي چې زده کړه او ادغام د هغو ستونزو د حل لاره ده چې تانیا کمبوري په خپل کتاب کې په ګوته کړې دي.
د وضعیت پر وړاندي مبارزه
د آلمان تر ټولو پر نفوسه ایالت نارد راین ویستفالین، کې له ۲۰۰۴کال څخه راهیسې په ټولو هغو ادارو کې چې مسلمانانو او مسجدونو سره اړیکي لري مسلکي ماموران په دنده ګمارل شوي دي.
یورګن کیش کمپر، له همدې مامورینو څخه یو دی. هغه ۲۰کاله د اضطراري حالت د ګزمې پولیس په توګه دنده تر سره کړې او کیش هم هغه حالات تجربه کړي دي چې تانیا کمبوري يي په اړه خپل کتاب کې لیکلي دي.
کیش له دویچه ویله سره په خبرو کې وایي: «موږ د پولیسو لانجو ته له مذهب سره تړاو نه ورکوو.» هغه وایي چې له پولیسو سره همکاري په ښه ډول سره مخ ته ځي. هغه نه غواړي چې د ټولو مسلمانو کډوالو په اړه یو نظر ورکړي او وایي چې داسي یو کار د هغه د تجربو خلاف دی.
کیش کمپر وایي چې هغه د هغو آلماني کډوالو د تاوتریښوالي تجربه لري چې له روسیي او د پخواني شوروي له جمهوریتو څخه آلمان ته راغلي دي او اوسمهال لبناني کډوال همداسې چلن کوي. دا په داسی حال کې ده چې د هغه په خبره یوازي ۴۰سلنه لبناني کډوال مسلمانان دي.
له ټولو هغو پلټونکو سره چې دویچه ویله خبرې کړي وايي چې تانیا کمبوري په خپل کتاب کې پر هغو موضوعاتو خبرې کړې دي چې د یوي لویي ستونزه یوه برخه ده او د دې ستونزې په اړه ټولیز او منفي پایلي پایلې نه شي ترلاسه کیدای.