آلمان اوکراين ته درنې وسلې ورکوي
۱۴۰۱ اردیبهشت ۶, سهشنبه
امريکا متحده ايالاتو د آلمان په رمشټاين سيمه کي په خپله نظامي اډه کي د اوکراين په هکله يو کنفرانس د سه شنبې په ورځ جوړ کړ. په دغه کنفرانس کي تقريباً د څلويښو هيوادونو استازو گډون لاره چي پکښي د ناټو د غړو هيوادونو د استازو تر څنگ د نورو هيوادونو استازي هم شامل ول.
د آلمان د دفاع وزيري کريستينه لامبرېخت په دغه کنفرانس کي د آلمان پر ضد هغه نيوکي ردي کړې، چي گواکي آلمان د اوکراين سره تسليحاتي مرستو ته چمتو نه دی. هغې وويل چي آلمان له دې کبله تر اوسه د درنو وسلو په هکله اقدام نه ؤ کړی، ځکه چي په يوازي سر يې اقدام نه غوښت. د هغې مقصد دا ؤ چي گواکي آلمان د خپلو ټلوالو سره په همږغي اوکراين ته د وسلو لېږلو د اقدام پلوي کوي.
کريستينه لامبرېخت په دغه کنفرانس کي اعلان وکړ چي آلمان به اوکراين ته د دافع هوا »گېپارد« ډوله ټانکونه ورکړي. هغې وويل چي آلمان چمتو دی چې په خپله خاوره کې اوکرايني عسکر تربيه کړي.
لامبرېخت اوکراين ته د آلمان له خوا د ټانکونو د ورکړي په هکله وويل: «گېپارد ټانک بالکل هغه څيز دی، چي له مځکي څخه د خپلي هوايي حريم د دفاع له پاره ورته اړتيا لري.»
د امريکا متحده ايالاتو د باندنيو چارو وزير، لويډ آسټين، کنفرانس ته د وينا پر وخت وويل چي امريکا به له اوکراین سره د روسيې د نظامي بريد آخوا هم مرستي وکړي. له دې مخکي د روسيې د باندنيو چارو وزير سرگې لاوروف په روسي دولتي تلويزيون کي ويلی ول چي ناټو د روسيې پر ضد په غيرمستقيمه توگه جگړه پر مخ بيايي.
په عيني حال کي د ملگرو ملتونو سرمنشي انتونيو گوتېريش هم روسيې ته خپل درې ورځنی سفر پېل کړی دی. هغه په مسکو کي وړانديز وکړ چي يوه داسي د تماس ډله دي رامنځته سي چي پکښي د ملگرو ملتونو، مسکو او اوکراين استازي په اوکراين کي د بشري ستونزو د حل له پاره سره يوځای وي.
آ./ا.ا./ن.ز.