Џафери му испрати писмо на Иванов и „летна“ за Брисел

Новоизбраниот претседателот на Собранието, Џафери го известил Иванов со писмо за составот на новото парламентарно мнозинство и му го предочил барањето за доделување мандат за состав на новата влада на лидерот на СДСМ, Зоран Заев.

Социјалдемократите информираа дека очекуваат од Иванов веднаш да го додели мандатот, а Заев е подготвен на шефот на државата уште еднаш „да му ја реафирмира владината програма“ која, како што велат, „е силен гарант на унитарноста и целовитоста на Македонија“. Со тоа треба да се отстранат сите сомнежи околу наводни редефинирања на државата, велат од СДСМ.

Истовремено, во Службен весник е доставено и барање за објавување на одлуката за избор на претседател на Собранието и истата треба да биде објавена во првиот нареден број, велат оттаму.

Откако ги заврши формалностите, Џафери утрово одлета за Брисел на средби со највисоките претставници на Европската унија, шефицата на дипломатијата на ЕУ, Федерика Могерини и комесарот за проширување Јоханес Хан, како и со пратеници во Европскиот парламент.

Претставниците на ЕУ, САД и одделни земји-членки на Унијата како Германија уште минатата недела експресно го признаа изборот на Џафери за претседател на Собранието и побараа да му се дозволи да си ја врши функцијата согласно законите и Уставот.