„Шатдаун“ во САД: Договор не е на повидок

Претседателот Доналд Трамп сака пари за изградба на ѕид на границата со Мексико. Конгресот не дава. И се додека нема компромис околу буџетот, нема пари за администрацијата.

Часовникот сѐ погласно отчукува. Медиумите и интернет порталите одбројуваат колку трае замрзнувањето на буџетот – во САД познато како „шатдаун“ – и до сега се поминати 5 дена. Од саботата дел од владата поради замрзнатиот буџет нема пари. Речиси четвртина од властите се погодени од ова – стотици илјади административци се приморани да одат на принуден одмор или за првпат да работат без плата. Американскиот претседател Трамп вчера во Белата куќа изјави дека не знае кога државниот апарат повторно ќе проработи непречено, но знае дека ќе продолжи само тогаш кога на границата со Мексико ќе биде изграден ѕид, или ограда, или како и да сака човек да ја нарече бариерата: „Не знам кога ќе биде отворена владата, но можам да ви кажам дека нема да биде отворена се додека немаме ѕид, ограда, или како и да сакаат да ја наречат бариерата“, рече претседателот.

5 милијарди долари за ѕидот

Финансирањето на оваа бариера е во фокусот на спорот за буџетот меѓу американскиот претседател Трамп и опозициските демократи. Ова е едно од главните предизборни ветувања на Трамп и тој постојано повторуваше колку е важно да се изгради ѕид на границата кон Мексико за да се запре илегалното доселување. За овој проект тој од Конгресот бара 5 милијарди долари, но таму нема мнозинство за овој проект. Лидерот на малцинската фракција на демократите во американскиот Сенат, Чак Шумер нагласи: „Ѕидот нема никогаш да добие поддршка во Сенатот, ниту денес, ниту следната недела, ниту следната година."

Повеќе:

-Трамп не е подготвен на компромис

-Принудни одмори поради ѕидот на Трамп

Шумер го повика претседателот едноставно да се откаже од својата идеа за да се прекине замрзнувањето на буџетот.

„Господине претседателе, претседателе Трамп, ако сакате владата да функционира тогаш мора да се откажете од планот за ѕидот – толку е едноставно.", порача Шумер. 

Во текот на неделава населението во САД се повеќе ќе почне да ги чуствува последиците од замрзнувањето на буџетот, бидејќи дел од музеите и националните паркови остануваат затворени, а дел од администрацијата нема може да ги обработува доставените барања. Републиканскиот сенатор Боб Коркер смета дека замрзнувањето на буџетот е излишно, а аргументите се детски: „Ова е целосно беспотребно и детски незрело."

Компромисот неизвесен

Сенатор Коркер вели дека одамна можел да понуди компромисно решение според кое демократите треба да одобрат поголема сума за заштита на границите и за возврат да се обезбеди правото на останок на луѓето кои уште како деца илегално дошле во САД, тука се пораснати и со децении чекаат да добијат дозвола за легален престој.

Дали и кога републиканците и демократите во конгресот ќе договорат некаков компромис е сѐ уште неизвесно. Утре парламентот повторно ќе заседава за да работи на изнаоѓање решение. До тогаш часовникот кој го мери „шатдаунот“ продолжува да отчукува и многу е веројатно дека тоа ќе продолжи и во новата година.