Уставна криза во Венецуела поради болеста на Чавез

Државното раководство во Каракас сака привремено да се откаже од формалното полагање заклетва на тешко болниот претседател Хуго Чавез (фото горе). Чавез останува на функција, иако поради лекувањето во Куба не може да дојде на церемонијата на полагање заклетва, која беше планирана за 10 јануари, изјави вице-претседателот Николас Мадуро на државната телевизија. Уставот во ваков случај, според Мадуро, нуди „динамична флексибилност“. Таа на претседателот му дозволува привремено отсуство за период од 90 дена, кое може да се продолжи за уште 90 денови. „Формалноста“ на полагање заклетва би можела да биде извршена подоцна пред Врховниот суд во земјата, рече Мадуро.

Вице-претседателот со ваквите изјави реагираше на барањето на опозицијата за нови избори, доколку Чавез не положи заклетва на 10 јануари. Генералниот секретар на опозициониот сојуз МУД, Рамон Гиљермо Авеледо, изјави дека уставот не е „маса за моделирање“, туку треба да придонесе за зацврстување на сигурноста на демократијата.

„Манипулациите доаѓаат од САД“

Мадуро пак, наспроти тоа, ја обвини опозицијата дека сака да ја дестабилизира Венецуела. Противниците на шефот на државата шират лаги и манипулации за да предизвикаат несигурност. „Ние знаеме дека САД се тие од кадешто доаѓаат манипулациите“, нагласи Мадуро.

Претседателот на Венецуела Хуго Чавез беше опериран од рак на 11 декември во Куба. Ова е веќе четврта операција на Чавез од дијагностицирањето на болеста во јуни 2011 година. Според вице-претседателот Мадуро, здравствената состојба на Чавез е променлива, но нема вистинско подобрување. Чавез е претседател на Венецуела од 1999 година.