Евроатлантската иднина на Македонија е во ризик

Претседателот на Советот на ЕУ Доналд Туск денеска ја предупреди Македонија да не дозволи поради внатрешната политичка криза да бидат ставени во ризик нејзините односи со Европската унија и со НАТО.

„На Европа ѝ е потребна стабилна ПЈРМ, водена од владеењето на правото. Евроатлантската иднина на земјата е во ризик“, изјави денеска Туск во реакцијата на најновите настани во Македонија.

Претседателот на македонското Собрание, Трајко Вељановски денеска официјално ги распиша предвремените парламентарни избори за 5-ти јуни, наспроти противењето на опозицијата, која смета дека условите за веродостојни избори не се исполнети. Покрај тоа, денеска повторно се очекуваат протести во Скопје поради одлуката на претседателот на државата Ѓорге Иванов за аболиција на политичарите.